Ole-Jakob Wiik, tiåring med flotte resultat i Haugesund denne helga. Foto: Privat.

Under andre dag av Gassco-lekene i Haugesund gjekk tiåringen Ole-Jakob Wiik til topps både på 600 meter og lengde etter svært sterke prestasjonar.

Me har etter kvart blitt vane med at fitjarungdommar med etternamn som Bø, Aga, Torbjørnsen og Pedersen har vist veldig godt att på resultatlistene når det blir skipa friidrettstemne i distriktet.

Men då Gassco-lekene i Haugesund blei avslutta i dag, fekk me sjå at Fitjar har fleire ess i ermet. Tiåringen Ole-Jakob Wiik vann både 600 meter og lengde, med personleg rekord i begge øvingane. I det lengste hoppet sitt landa han på 3,67 meter, og på 600 meter kom han i mål på 2.01,33, nesten ti sekund føre nummer to på distansen.

Ole-Jakob har ei åtte år gammal søster som heiter Sunniva. Ho nytta dagen til å hoppa 2,23 i lengde og setja pers på 60 meter med 11,24.

Bjart Sandvik Bø (13) fekk fjerdeplass i høgde med 1,25. Johannes Sandvik Bø (14) nytta søndagen til å hanka inn to gullmedaljar til, med to nye personlege rekordar. På 1500 meter fekk han tida 4.26,19, og på den litt uvante distansen 200 meter vann han på 26,90.

Johannes fekk elles bestemannspris på stemnet for laurdagens siger på 800 meter, som gav 1038 poeng etter Tyrvingtabellen. Det er berre å gratulera!

Sunniva Wiik går over mål på ny pers på 60 meter i Haugesund i dag. Foto: Privat.