Marius Torbjørnsen går over 1,75 under Gamalostfestivalen i Vik i Sogn. Foto:FP-arkiv.

Fitjar IL stilte ein liten, men sterk tropp til ope Bømlo-meisterskap i  friidrett på Bremnes i dag, og det beste resultatet stod Marius Torbjørnsen for då han gjekk over 1,73 i høgde.

Resultatet til Marius er 2 cm bak den personlege rekorden hans på 1,75. Trenar Bård Inge Bø stoppa på 1,65 denne gongen, og dermed er det snakk om eit høgdemessig paradigmeskifte …

Trenaren slår fast at resultatet lovar godt før UM, som går av stabelen på Jessheim om to veker. Dette er aldersbestemt NM for ungdom over 15 år, og det er berre Marius frå Fitjar som er kvalifisert.

Marius Torbjørnsen sprang òg ein god 400 meter i sterk vind på Bremnes, på 59,41, som er 2,5 sekund bak personleg rekord. Han vann også 60 meter på 8,24 i litt motvind, eit tidel bak pers.

Ein forkjølt Johannes Sandvik Bø fekk 1,40 på 600 meter i den tidvis sterke vinden, og måtte sjå seg slegen av far Bård Inge Bø, som kom inn på 1,34. Bjart Sandvik Bø fekk 2.06,10 på 600. Han er stabil, men var eit drygt sekund bak personleg rekord.

Elles var det familieoppgjer på 400 meter, der Torbjørnsens okkuperte fire av seks banar. Olve (7), Marius (16), Dan (45) og Tori (10) Torbjørnsen sette så avgjort sitt preg på denne øvinga, naturlegvis med Marius som bestemann.

Marius Pedersen var ikkje med til Bremnes, for han førebur seg til stemne i Haugesund på tysdag, der han skal delta i lengde og 600 meter.

Fire blad Torbjørnsen startar på 400 meter på Bremnes i dag. Foto: Privat.
- Annonse -