Til helga skipar fotballgruppa i Fitjar IL vintercup for 20. gong, etter oppstarten i november 1992.

Førehandsomtalen i bladet «Sunnhordland» den gongen var prega av djup skepsis, noko overskriftene 20. november 1992 bar preg av: «Farleg fotball i Fitjar» og «Avbiten tunge og øydelagde bein». Det gjekk kanskje litt hardt for seg, med for mange feite og utrente førtiåringar på banen.

Men det var langt frå så ille som skribenten i «Sunnhordland» såg for seg. I alle høve var rapporten positiv etter at Vestbøstad hadde slege Kalveid/Skålevik i finalen, og vunne den første vintercupen i Fitjar. Me kan lesa i «Sunnhordland» måndag 23. november 1992: «Dette var ein god og underhaldande fotballkamp, milevis frå den harselerande reportasjen i Sunnhordland fredag, seier Håkon Hartvedt i arrangørgruppa.»

Når den 20. vintercupen blir avvikla til helga, er det etter same leisten som i fjor, og om lag som kvart einaste år etter oppstarten i 1992. Den tradisjonsrike cupen har behalde profilen sin som ein krinscup, der dei forskjellige krinsane stiller sine lag. Reglane seier at spelarar skal høyra til ein krins, i form av å bu der, slekt, familie etc. 

I dameklassen reknar ein med 5 lag i år òg, Bakken/Havn, Vestbøstad, Dåfjorden, Øvrebygda og Stratos/Resten. Her spelar ein 5-arfotball. Herreklassen er også relativt stabil med dei faste laga Bakken, Havn, Vestbøstad, Stratos, Storavatnet, Sentrum, Fitjarstølane og ev. Dåfjorden. Her spelar ein 7-arfotball.

Mange nye spelarar av 1995–/96-årgangen er no klare for cupen, så tilveksten er fin. Alle laga blir oppnemnde med lagleiar. Dersom nokon ønksjer å delta i årets vintercup, men ikkje har fått tilbodet, må dei ta kontakt med dei respektive lagleiarane i sin krins, blir det meldt frå arrangementskomiteen. Årets komité som jobber med cupen er Rune Brakedal, Ole Bergesen og Anne Helene Vestbøstad. Er det spørsmål, er det berre å ta kontakt med Ole Bergesen, på telefon 95 97 51 50.

Eit høgdepunkt kvart år er den høgtidelege trekninga av puljane. Den finn stad torsdag 3. november kl. 21.00 på Fitjar Fjordhotell. Dette er ein høgtideleg seremoni som er vel verd å få med seg som opptakt til all dramatikken i helga.