Vintercupen til Fitjar Idrettslag har etter kvart blitt tradisjon, etter oppstarten i 1992. Og fredag 24. oktober brakar det laus igjen.

Cupen startar opp med trekning torsdag 23. oktober kl. 22.00 på Fitjar Fjorhotell. Dette plar vera ein hending som er verd å få med seg. Sjølve turneringa startar fredag kveld. Laurdagen held turneringa fram til finalane i begge klassane er avvikla ein gong utpå ettermiddagen.

Nøyaktig tidsplan, kampoppsett osv. blir tildelt etter trekninga torsdag kveld. Lagleiarane er ansvarlege for at laget stiller til kampane, og for å innhenta kampoppsett – og retta seg etter gjeldande vintercupreglar. Herrane spelar 7-arfotball, medan damene spelar 5-arfotball.

I herreklassen plar det stilla 8-10 lag frå ulike delar av bygda. Åtte av laga har vore med heilt frå starten i 1992: Bakkjen, Fitjarstølane, Havn, Kalveid/Skålevik, Sentrum, Storavatnet, Stratos og Vestbøstad. Seinare har me sett lag frå Dåfjorden, Sør-Strando og ”Utvandrarane”. Vinnar i fjor blei Vestbøstad, som slo Stratos i finalen.

I dameklassen har deltakinga vore litt mindre; i fjor deltok 5 lag. Damene deltok for første gong i 1994, med lag frå Bakkjen/Hamn, Kalveid/Vestbøstad, Stratos og Resten. I fjor deltok også lag frå Øvrebygda og Dåfjorden, men vinnar blei eitt av laga med lengst tradisjon, Kalveid/Vestbøstad.

Spelarane på eit lag skal ha tilknyting til byggjefelt eller bygdelag i form av familie, ektefelle, sambuar eller bustad. Men keeperar blir det gitt dispensasjon for. Andre dispensasjonar må klarerast med Ole Bergesen. 

Tradisjonelt har ikkje vêrgudane vore på fotballfolket si side under vintercupen. Men det er alltid lov å håpa på eit unntak. Og uansett vil fotballgruppa gjera sitt til at vintercupen blir ei like hyggeleg oppleving som den plar vera. Det blir kiosksal, varmetelt og resultatservice. Dei fysiske forholda ligg vel til rette, med ny kunstgrasbane og tribuneanlegg. For mange er dette eitt av få høve i løpet av året til å treffa gamle kjende.  Som gjerne trekkjer heimover denne helga,  til ikkje altfor fredeleg kappestrid…

Laurdag 25. oktober kl. 20.00 blir det bankett på ”Fitjartun”. Den blir kombinert med årsfesten til fotballgruppa i Fitjar Idrettslag. Her blir det premieutdeling. NB! 18 års aldersgrense og eiga påmelding.

Me seier ikkje som teaterfolket: ”break a leg”. Men kryssar fingrane for godt ver og fair play.

Påmelding til vintercupen 2008: Ole Bergesen 95 97 51 50.