Under veteranbiltreffet i godvêret på Leirvik i dag stakk fitjarbuen Knut Inge Drønen av med publikumsprisen.

Han stilte med ein 1960-modell Morgan 4+ i konkurranse med 40 andre flotte bilar på torget på Leirvik. Knut Inge fortel at han kjøpte bilen for eitt år sidan for rundt 200 000 kroner. Den er handlaga på fabrikken i England, og består av mykje treverk. Rammeverket er for det meste laga av ask, som er dekt med stålplater. Sjølv om bilen ikkje er heilt billig i innkjøp, der den ikkje dyr å eiga. Vedlikehaldsutgiftene er små, og årsavgifta er berre 360 kroner, pga. at det er ein veteranbil.

Knut Inge er ofte ute og kjører i den flotte, blå veteranbilen sin, som er ein fin godvêrsbile. Men den er fullt brukbar i all slags vêr; den har nemleg skikkeleg kalesje, slik at Knut Inge kan sitja innandørs og kjøra.

Laurdag 12. juni blir ein stor dag for veteranbilentusiastar her på øya. Då kjem om lag 50 veteranbilar frå 1905 til 1940 med ferja frå Halhjem. Dei kjem frå all verdas kantar; ein av dei kjem visst nok heilt frå Australia. Dei vil bli å sjå ein time i Fitjar sentrum saman med Knut Inge Drønen sin Morgan 4+ og ein del andre lokale veteranbilar. Knut Inge og ein del andre lokale kjenningar vil følgja dei langveisfarande veteranbilane til Stord, før dei gjer vendereis. Ein heil kortesje med lokale veteranbilar vil kjøra nordover til Fitjar for å markera 100-årsjubileet for vegen «over Morkjo» mellom Stord og Fitjar.