Huset me snakkar om finn me på tunet ved Peraløo i Vik. No om dagen vart det baka for fullt i dette nyrestaurerte huset som opprinneleg er over 100 år gamalt. Foto: Håkon C. Hartvedt

Såleis var det full aktivitet i bakehuset då me var oppom for nokre dagar sidan. Kvinner frå Fitjar bygdekvinnelag var då i full gang med å bake potetkaker til Fitjarfestivalen.

Akkurat det skal me kome tilbake til i ein annan samanheng. Her skal me fortelje at Per Drønen for det første har restaurert huset. Både taket og bordkledninga er skifta – og dei gamle tømra veggene har òg fått ny bunad.

 

Endå meir spennande er den nye bakaromnen, ein skikkeleg god, gamal, vedfyrt steinbakeomn. Også murt opp av Per Drønen.

Ingolv Rimmereid som var bakar i sin ungdom fortel at han var van med ein slik då han jobba hos Henriksen i gamle dagar.

-Fyrer ein godt opp med ved i to timar og rakar ut glørne, held omnen steikevarme i seks sju – timar, seier Per, og Ingolv kan supplere med at i gamle dagar steppa fitjarkoner opp hos Henriksen før jul og fekk mellom anna steike julekjeksa sine på ettervarmen, etter at bakeriet hadde fått steikt sitt for dagen.

No kan ein sjølvsagt steike det same som før, men ein liten «spesialitet» har dei i Vik. Det er steinomnsbakt italiensk pizza.

Her kan ein òg steike italiensk pizza. Foto: Håkon C. Hartvedt