Trass i klaskregn med haglebyer var ikkje barnetoget tidlegare i dag noko særleg kortare enn det brukar å vere. Og når prosesjonen starta med feiande marsjar frå Fitjar Skulekorps midt i uveret, og barnetoget nådde sjukeheimen, gav regnet like godt opp. Foto: Håkon C. Hartvedt

Regnet hindra altså ikkje at mykje folk samla seg i sentrum då skuleborna og skulekorpset tradisjonen tru møtte på Tinghusplassen. Her fekk me òg i år høyre ein flott appell ved skuleelevar frå 6. klasse. Denne gongen var det Eirin Oma og Sofie Rimmereid frå Rimbareid skule som stod for appellen, som mellom anna handla om venskap, både nært og fjernt.

Sofie og Eirin. Foto: Håkon C. Hartvedt

Tom Rydland er på reise, og i hans stad steppa Håkon Rydland Sæbø inn som forsongar på «Fagert er landet», og Ole Bergesen leia det heile rutinert og trygt – denne gongen ikledd lilla regncape.

Artig, særs naudsynt – og ei stadfesting av at det handlar ikkje «om dårlig vær, men høvelige klær».

Stemninga på Tinghusplassen og i prosesjonen var då òg upåklageleg.

Vêret på det verste. Men smilet er på plass. Foto: Håkon C. Hartvedt

 

Korps i klaskregn. Foto: Håkon C. Hartvedt

Prosesjonen med Vidar Larsen i front er òg blitt ein tradisjon. Foto: Håkon C. Hartvedt

Denne gladgjengen møtte ved Fitjar vgs då regnbyene hadde roa seg. Stemninga var god – og utover dagen skulle nokre av dei i familieselskap, nokre på andeløpet – og ettermiddagsaktivitetar i Øvrebygda var òg på programmet. F.v Oddrun Børtveit, Laila Hovland, Helene Baardset Hovland, Nils Arbe Helland og Hanne Emilie H. Hovland. Framme ser me vesle Elisabetn på 3 år og hunden Dina på 7 år. Foto: Håkon C. Hartvedt