Ein gjeng lettkledde og våte ungdommar på vandring langs Fv545 i Fitjar viste seg å vera speidarar frå Belgia.

Dei lettkledde – og lettskodde – ungdommane vekte ein viss åtgaum der dei vandra langs fylkesvegen i shorts og slippers; enkelte av dei var til og med berrføtte. Me fekk kontakt med dei på Årbø, og då mottaksapparatet vårt etter kvart innstilte seg på fransk, skjøna me at dei heldt til ved Øvrebygda skule.

Under skuret på skulen hadde leiarar i følgebilen deira sett opp telt og så smått begynt å gjera klart for overnatting. Dei 26 Pionnieres-speidarane er gutar og jenter mellom 17 og 24 år frå landsbyen Esneux i Belgia. No er dei på ein to vekers fottur frå Bergen til Stavanger. Dei kom til Bergen onsdag denne veka, med tog, etter å ha komme med fly frå Belgia til Oslo. I morgon har dei tenkt å gå til Bømlo, og så går ferda vidare sørover til Karmøy, før dei tar ferja til Stavanger, og fly heim att til Belgia.

Rektor Sigbjørn Aarland seier til fitjarposten.no at han gir speidarane løyve til å overnatta under skuret på skulen. Han går ut frå at dei er skikkelege folk.