Fitjar Racing Team kom heim med ein A-finale og ein B-finale etter Todagarsløpet i Vikedal sist helg.

Best av Fitar-racerane denne gongen var Håvard Helland i rallycross. Han begynner å få sin Volvo 940 til å fungera slik han vil, og kjørte inn til andreplass i A-finalen, berre slegen av Ørjan Strand Eikeland. Ved hjelp av nyinnkjøpte vekter frå USA fekk dei justert bilen torsdag kveld, slik at den fungerte betre enn nokon gong. Håvard seier til Fitjarposten at no begynner bil og førar å bli skikkeleg samkjørte. Og dei som kjenner Håvard seier han er meir positv enn på fleire år. Så det skulle lova godt for resten av sesongen. Men no blir det ikkje meir konkurransekjøring før i slutten av august; då blir det bakkeløp og rallycross i Vikedal. Sommaren skal han bruka til trening og til å gå skikkeleg over bilen.

Gisle Aarbø oppnådde ein 4.-plass i B-finalen, noko som gav 9.-plass totalt, etter varierande innsats i dei innleiande heata. Laurdag kjørte han tre omgangar; han blei nummer 1 i første heatet og sist i andre heatet. Søndag blei det 4.- og 5.-plass i dei siste to innleiande heata, slik at han hadde beste startspor i B-finalen. Her kom han inn til 4.-plass etter at bilen ikkje hadde fungert optimalt. Test av motoren viste dårleg kompresjon, så den må overhalast. Han reknar med å byta stempelfjører, men kanskje må han setja i ei anna blokk, som han har på lur. Gisle reknar med å ha bilen klar igjen til løp i Bergen neste helg, der han vonar å få med seg kompisen Jonas Koløen Lønning.

For Jonas sin del blei Todagarsløpet ingen stor suksess. Bilen stoppa i to av tre heat laurdag, etter at han hadde teke starten i fleire av heata. Det nyttar lite at bilen er startrask, når motoren stoppar i første sving! Det blei mykje skruing laurdag kveld, utan at det løyste alle problema.I første heatet søndag tok han igjen starten, men stoppa i første sving. Etter tips frå kyndige folk i miljøet fjerna han bensintrykksregulatoren før siste omgang. Då gjekk bilen som eit skot, men det var for seint til å kvalifisera seg for finale. Dermed må Jonas vinka farel til landsfinalen i bilcross i år og. Denne går av stabelen på Gardermoen i slutten av juli, og Gisle Aarbø blir åleine om å forsvara Fitjar-fargane.