A-laget til Fitjar spela ein ny kjempekamp laurdag ettermiddag, då dei vann heile 6-1 borte mot Halsnøy.

– Ikkje alle kjem til å vinna 6-1 mot Halsnøy borte, seier ein fornøgd Kjell Træet etter at laget hans i går kom heim frå Halsnøy med ein storsiger i bagen. Dette er ein av dei tøffaste motstandarane i 5. divisjon, meiner Fijtar-trenaren, som vedgår at kampen var jamnare enn resultatet skulle tilseia. Men han er naturlegvis godt fornøgd med laget sitt.

– Alle gjorde som dei hadde fått ordre om; dei gjekk ut på banen for å «vinna krigen» mot eit hardspelande heimelag.

Fitjar-trenaren meiner alle spela godt, men han er ekstra fornøgd med Torbjørn Korsvik, som gjekk føre med eit godt eksempel. Han fekk dei andre med seg, så Fitjar vann dei fleste duellane. Kjell er òg godt fornøgd med at spelarane var flinke til å komma rundt på kantane, og få lagt inn framfor mål. Der ser det ut til at Thomas Vestbøstad Waage er i ferd med å finna formen frå to år tilbake.

Med dagens storsiger ligg Fitjar framleis og kjempar i toppen av 5. divisjon, tre poeng bak Bremnes, som har spela ein kamp meir.