Fitjarbuen Kjell Arne Berntsen vart den lukkelege vinnar av hovudpremien i fitjarposten.no sin julekalender 2008. – No er det berre å planleggja tur, smiler han.

Når han reiser til Hafjell Hotel & Apartments på Lillehammer, der han har vunne eit opphald på fem døger for to vaksne og to barn, er ikkje Berntsen heilt sikker på.

-Men tur blir det! No må me berre setja oss ned og finne ut av når me skal reise, og få dette klarert med arbeidsgjevar, seier Berntsen, som ikkje ser bort ifrå at det kan bli ein vintertur, utan at han vil låse det. Gåvekortet går uansett ikkje ut før om eit år.

Fitjarposten la ut vinnarresultata direkte på nettet, men Kjell Arne var ikkje den første som såg det. Men då han fekk sms om det frå ein kamerat, var han ikkje sein om at ta seg inn på datamaskinen for å sjekke om dette verkeleg var tilfelle.

Seinare har andre kamerater kome spøkjefullt til han og sagt: -Når blir det afterski?

Kjell Arne Berntsen fortel elles at han var inne på julekalenderen kvar dag, og svara. Han syntest spørsmåla var greie, sjølv om han måtte googla litt på nokon. -Og eg skal nok innpå neste år òg, ler han, til slutt.