Ingve André Strand og karten hans viste solide takter i innleiingsheata, men eit uhell i første sving øydela dagen for NM-favoritten frå Fitjar.

Etter to andreplassar og ein siger i innleiingsheata hamna Ingve André i andre rekkje i starten på A-finalen under gårsdagens NM-runde i Vikedal. Frå denne posisjonen er det sjølvsagt råd å avansera og komma opp i teten, men denne gongen blei det for trongt. Ingve kom bra ut frå start, men i første sving var han midt i køen og bremsa nokre tidelar før konkurrenten som kom bakfrå. Dermed fekk Ingve ein dytt og snurra rundt, og måtte ta ein liten ekstra runde for å komma på sporet.

Då var det sjølvsagt for seint for Ingve å nå att dei andre favorittane, som raste ifrå. Om det kan vera noka trøyst, var svensken Jonathan Walfridson endå meir uheldig. Etter å ha leia store delar av løpet, blei han ståande fast i vegkanten eit par rundar frå mål. Ingve hadde meir enn nok med å unngå nest sisteplassen, sjølv om han faktisk køyrde best av alle i finalen etter at han hadde kome på sporet att. Men då var det altså for seint.

Finalen blei eit oppgjer mellom den gamle kjenningen Ludvik Einarsen, og Marius Vardeberg, debutant i den største klassen. Einarsen vann den jamne duellen, medan Jack Fjelstad tok tredjeplassen.

Med dagens 7.-plass opna Ingve sesongen ein plass svakare enn dei siste åra, og fekk ikkje den flying starten som han hadde vona på. Å seia om ein mann som fyk ut i hundre i crosskarten sin at han er ein «slow starter» er vel å ta litt sterkt i. Men han har det med å opna NM-sesongen litt moderat for så å koma sterkare og sterkare utover sesongen. Denne gongen hadde både Ingve og støtteapparatet vona på ei betre sesongopning, slik at det ikkje skulle vera så mange poeng å ta att på dei andre favorittane.

Slik gjekk det altså ikkje, men sjølv vel Ingve å fokusera på det positive. – Det er små marginar, og dette viste at eg har nivået inne, seier han til Fitjarposten.

Positivt var det og å sjå køyringa til junior, Anders Halleråker Strand. Han er debutant i 250 ccm-klassen i år og viste at han har klart overgangen bra, ved å koma seg til A-finalen. Her kom han eit godt stykke bak, men han yppa seg lenge mot dei beste. 8-plass er absolutt godkjent innsats.

Neste runde i NM går av stabelen 28. juni når NMK Orkla står som arrangør på Wallenberg Arena. Då er det å vona at Ingve gjentar suksessen frå førre gong han var på den banen. Det var hausten 2012, då vann han siste NM-runden i suveren stil.