Det unge A-laget til Fitjar kjempa seg til eitt poeng i dagens oppgjer mot Søre Neset.

Lag nr. to og tre på tabellen møttest 2. pinsedag til kamp om nye seriepoeng i idrettsparken. Anført av Roger Almås og Kjell André Thorland på midten tar Fitjar styringa i kampen frå start av. Etter 7 minutt får Fitjar frispark frå 25 meter. Via Søre Neset sin mur set Roger Almås ballen i mål, og Fitjar har fått ein kjempestart på kampen.

Fitjar fortset med å ha eit visst grep om kampen, og Ronald Skår er nær på å legga på til 2-0 når han blir spelt gjennom forsvaret til Søre Neset, men ballen stryk på feil side av stolpen. Etter 35 minutt må Roger Almås hinka av banen etter ein smell i kneet. Dette bidrar nok til at Søre Neset sakte, men sikkert tar over styringa av kampen, og dei pressar på for utlikning inn mot pause. Men Fitjar-spelarane rir av «stormen» og tar med seg 1-0-leiinga inn i garderoben ved halvtid.

Andre omgang fortset med Søre Neset som det førande laget spelemessig. Og allereie etter 2-3 minutt ligg ballen bak Oddgeir Træet i Fitjar-buret. No kjører Søre Neset på for å avgjera kampen, men eit par viktige redningar av Oddgeir gjer at det fortsatt står 1-1. Fitjar-laget jobbar seg sakte men sikkert inn igjen i kampen og er ved fleire høve farlege på kontringar. Både Thomas V. Waage og Jan Åge Tislevoll kunne fort ha sendt Fitjar i leiing på slutten.

Kampen ebbar likevel ut med 1-1, eit resultat som Fitjar-laget skal vera bra fornøgd med. Søre Neset har enno til gode å tapa i årets serie og vil nok garantert vera med og kjempa om opprykket i denne puljen. At det unge Fitjar-laget «nektar» å tapa slike oppgjer, lovar godt for sesongen vidare.

Ronald Skår starta kampen på spissplass, men spelte siste timen på stopparplass. Han løyste begge oppgåver veldig godt og var alt i alt Fitjar sin bestemann saman med midtbaneduoen Jan Åge Tislevoll og Kjell André Thorland. I tillegg viste Oddgeir Træet solid keeperspel.

Neste kamp er borte mot Vadmyra IL førstkommande fredag.