A-laget til Fitjar kom seint heim frå Bergen søndag kveld, med eitt poeng i bagen, etter 1-1 mot Trane.

Trane tok 16. mai imot Fitjar til kamp om seriepoeng på Krohnsminde i Bergen. I Bergens-regnet er det Trane som tar tidleg ledelsen i kampen, eit innlegg frå venstre blir heada i mål av ein Trane-angripar. Trane-spelaren kjem høgt opp i lufta, men målet burde nok ikkje vært godkjent, etter som Trane-spelaren bruker nevane for å komma opp i duellen.

Fitjar-spelarane lar seg ikkje «knekka» av ein tidleg baklengs, men tar etter kvart over initiativet i kampen, og laget produserer fleire gode sjansar. Fitjar-gutane pressar motstandarlaget tilbake på banen, er flinke i gjenvinngsfasen og produserer ei rekkje hjørnespark, men utteljinga lar venta på seg. Nærmast scoring er Mats Brakedal og Thomas V. Waage, men laget må gå til pause uten utteljing etter ein omgang der Fitjar er det beste laget.

Andre omgang jamnar seg meir ut spelemessig, men det er ikkje ufortent når Thomas V. Waage pressar Trane sin keeper på eit tilbakespel og utliknar til 1-1. Kampen ligg no og vipper og Trane har eit par bra sjansar utan teljande resultat. Leif André Tangen på Fitjar sin høgre kant «parkerer» Trane sin venstreback ved fleire høve mot slutten, og det er berre mangel på presisjon i avslutningane som gjer at det fremdeles står 1-1.

På overtid blir Thomas V. Waage spelt gjennom Trane forsvaret og runder keeper, på streken står ein Trane forsvarer som klarerer ballen ut i beina til Brynjar Engelsen, som frå 5 meter dessverre set ballen utanfor mål.

Alt i alt ein veldig bra gjennomført borte kamp mot ein bra motstander, med 6 juniorar og 1 gutespelar frå start skal ein vera godt fornøyd med prestasjonen mot eit rutinert Trane-lag. Trenar Stein Gunnar Halleråker synest det er spesielt kjekt å sjå at dei unge spelarane no begynner å tilpassa seg seniornivået.