Nabokommunen vår i aust, Tysnes, arrangerer i desse dagar Tysnesfest for femte gong.

Arrangementet vert stadig  meir storslagent, og dei kan i år skilte med artistar som Ole Edvard Antonsen, Madcon og veteranane Toto.

Den legendariske gruppa Toto har hatt hits som mellom anna Rosanna, Africa og Hold the Line. Me har høyrt at det kjem mange besøkande som var ungdom og vaksne på åttitalet til konserten i kveld. Musikken vert variert.

Allereie torsdag sto Erik og Kriss, Kurt Nilsen og Katzenjammer på Fyret scene, ei av dei to scenene som er lokalisert ved Tysnes skule. Programmet for festivalen finn du på Tysnesfest.no.

Nokre steinkast unna finn vi Camp Tysnesfest, ein campingplass som berre eksisterer under festivalen. Det er her Fitjarpostens utsendte medarbeidar bur. Etter eit døgn på festivalcampen, er inntrykket svært positivt. Her er det ungdommar i spesialinnreda festivalvogner, og plass til både bobilar, campingvogner og telt, i kvar sine «leirar», seier May-Lill Helgesen som driv campingplassen saman med mannen sin.

Tysnesfest er ikkje berre for dei festivalglade. På laurdag er det marknadsdag, eit arrangement som har auka i omfang for kvart år. Me har prata med Gunvor Sundal Davidsen, som skal vere med for femte gong. Ho sel keramikk, heimesydde barneklede og smykke. – Eg gler meg kvart år, seier ho, og legg til at vêret alltid er godt på marknadslaurdagen.

Det er litt å gjere for dei minste og. I Våge er det tivoli, og på marknadsdagen er det både sjørøvartokt og show for den yngre garde. Dei tidlegare åra har laurdagsarrangementet vore stor suksess hos skribenten sine ungar.

Om de vil få med dykk konsertar på kveldstid, skal det vere sett opp ekstra ferjeruter. For meir informasjon om program, skyss og overnatting, sjå her.