Dei ivrige turdamene Angunn Bårdsen og Ellen Vestbøstad serverer jubileumskake. Foto: Kjetil Rydland.

Ein flokk «raudegardistar» sette sitt preg på Sentrum i dag, då dei feira 25-årsjubileet for Stord-Fitjar Turlag.

Den raude horden som invaderte gata utanfor Spar-butikken til Larsen i dag, var av det særs fredelege slaget. Dei serverte nydeleg marsipankake og ikkje fullt så nydeleg bålkaffi til interesserte forbipasserande.

Dei yngste fekk premie av Angunn Bårdsen etter at dei hadde gjennomført ei kort TURTIPP-løype i Håkonarparken. Ikkje alle oppgåvene var like enkle; Victoria og Marius Drønen var veldig usikre på kva slag bæsj du kan eta utan å verta dårleg. Og det låg jo ikkje akkurat til rette for å testa dette ut …

Victoria (5) og Marius (9) Drønen på TIPPTUR i Håkonarparken. Foto: Kjetil Rydland.

Men dei skein om kapp med sola, til liks med dei vaksne som blei med på jubileumsarrangementet i Sentrum i dag. Angunn Bårdsen serverte marsipankake saman med Ellen Vestbøstad. Og dei klarte å rekruttera nokre nye turlagsmedlemmer, som kunne smykka seg med ei flunkande ny DNT-lue etter innmeldinga.

Etter det me kunne sjå, var det helst turfolk av den eldre generasjon, og dei aller yngste, som møtte opp til dagens feiring. Men det ser ut til at Turlaget opplever ei blomstringstid på Stordøya, med over 1200 medlemmer og stadig aukande aktivitet. Laget har engasjert seg mykje i Fitjar i det siste, og me ønskjer laget 25 nye gode år.

- Annonse -