Klubbfargane til Fitjar Racing Team viste godt att i Vikedal i helga. Foto: Ole Lønning.

Denne helga har Fitjar Racing Team hatt fem førarar i aksjon under fellestrening med bilsportfolk frå andre delar av Vestlandet.

Etter ein lang vinter og vår, var det endeleg lov å køyra litt igjen, og ein løpssugen gjeng frå Fitjar drog innover til Vikedal fredag ettermiddag. Der møtte dei kollegaer frå Bergen og Eigersund, i tillegg til klubbkameratar frå NMK Vikedal.

Då treninga tok til på fredag, var Ole Lønning, Julian Helland, Benjamin Hall, Oliver André Matre og Håvard Helland frå den lokale bilsportklubben vår på plass i godvêret i Vikedal.

Fredag blei det berre køyrt eit par timar, men laurdag blei det motorbrøl frå morgon til kveld, og alt fungerte bra, melder Ole Lønning. Han er framleis junior, og satsar på ein ny sesong i Volvo.

– Alt gjekk meget bra, veldig bra opplegg, og bilane funka 100 %, seier ein fornøgd koløygut til Fitjarposten.

Julian Helland (Ford Sierra) og Benjamin Hall (Volvo) er òg juniorar, og ferskare enn Ole Lønning. Det er ikkje senioren Oliver André Matre, som har vunne det meste i bilcross med VW-boblene sine.

Veteran i Fitjar-gjengen er Håvard Helland, som køyrer rallycross i den største klassen i Volvo. Med god hjelp frå datakyndige kompisar har han no fått finjustert dysene som gir motoren det rette blandingsforholdet mellom luft og bensin.

Det blei ikkje køyrt vanlege heat i Vikedal denne gongen. Førarane måtte starta enkelttvis, men for å gjera det meir interessant for førarane, var det uoffisiell tidtaking. Slik fekk dei målt seg mot kvarandre, noko som var svært velkome; det er jo konkurranse dei driv med!

Og neste gong dei møtest, blir det meir som ein vanleg konkurranse. Førarane kan nemleg gle seg til klubbløp i Vikedal i september.