– Skal det ikkje vere ein historisk brønn her i nærleiken, var spørsmålet me møtte midt i Sjøsbrekko i går. Det synte seg å vere familiemedlemer i tre generasjonar som var svært lokalhistorisk interesserte.

Alle ber dei etternamnet Giezendanner fordi eldstemann, og representant for den eldste generasjonen, Leo (85), er fødd i Sveits. No bur alle i Noreg. Dei to andre ber namna Håvard (56) og Bård (28).

Dei har vore svært mange stader på Vestlandet for å sjå på gamle kulturminne, og i går hadde dei som mål å vitja Fitjar pluss Ølen og Etne. Leo fortel at han i si yrkesaktive tid reiste rundt på Vestlandet i 30 år som legemiddelkonsulent, alltid med Snorre sine kongesoger i baksetet. No har historieinteressa smitta nedover i generasjonane.

Me tok dei sjølvsagt med til Kongsbrønnen og fortalde litt av det me visste om den. Leo hadde sett han før, men då såg han ikkje slik ut. Men han gledde seg over dei informative skilta både der og i Håkonarparken.

Turen gjekk så til Årskog museum. Me hadde ikkje høve til å gå inn, men karane var svært nøgde med å få sjå det gamle tunet, bygningane og særpreget. Dei fekk vidare eit lite inntrykk ved å sjå inn gjennom vindauga. Ei lita orientering om museet fekk dei òg med seg.