Mange deltok i tradisjonell juletregong.

 Fitjar søndagsskule sin julefest den 30.desember hadde mange kjekke innslag.

Mange hadde teke turen til bedehuset denne ettermiddagen og fekk oppleva eit variert program.

Festen byrja med eit juleopptrinn. Tre av dei eldste ungane på søndagsskulen song «Her i Betlehem» etterkvart som hyrdar, kongar, englar og vismenn kom inn for å sjå det litle barnet i krybba.

Me fekk også høyra flott song. Først song alle søndagsskuleungane og etterpå spelte Ingvild M. Oma piano medan ho og Ingvild Prestbø song «I en natt» av Bjørn Eidsvåg.

Ingrid Heie haldt andakt og tok utgangspunkt i ein trassig fireåring som ikkje ville dela julepresangen med nokon andre. Han hadde fått eit sendebrett, men visste ikkje korleis det skulle brukast. Heldigvis var det ein av søndagsskuleungane, som viste korleis det virka, og fekk lov til å visa «den litle sinte guten». Dersom ein skulle ha glede av sendebrettet måtte ein senda det til nokon andre som tok imot det. Bodskapet til Ingrid var at juleevangeliet må takast imot dersom ein skal oppleva meininga med det.

Ein gjeng frå «Klubben» stod for dei humoristiske innslaga og viste to sketsjar.

Etter at me hadde ete wienerbrød og kakemenn og drukket kaffe, te eller saft vart borda rydda vekk for å laga plass til juletregong. Store og små samla seg rundt det flotte treet og song dei gode gamle julesongane som alle kan. Ei gruppe med blåsarar skapte ekstra julefeststemning.

Søndagsskulen tok juleferie, men startar allereie  opp igjen den 11.januar kl.11.00.

Mange deltok i tradisjonell juletregong.