Her kjem Ingve André Strand (697) til kort mot ungdommen Bjørn Cato Aarekol i Vikedal. Foto: NMK Vikedal.

Den tidlegare norgesmeisteren vår i crosskart, Ingve André Strand, har hatt ein litt trå start på sesongen, og under den første NM-runden kom han ikkje til mål.

Det var ein optimistisk veteran som la ut på langtur frå Søre Stølen til Sørlandet før helga. Etter andreplass bak ungdommen Bjørn Cato Aarekol i Vikedal for eit par veker sidan var Ingve André Strand på hogget føre NM-runden, som gjekk av stabelen på Ruglandsbanen like nordaust for Kristiansand sentrum.

Første dag gjekk middels bra for den lynraske fitjarbuen. Under laurdagens kvalifiseringsheat blei det først ein femteplass og så ein tredjeplass. Ingve klaga over at han hadde slite med ein motor som fuska då me snakka med han etter løpa. Men han rekna med å få løyst problema til søndagens heat.

Han gjekk over forgassaren, sjekka bensintilførsla og skifta coil, og såg lyst på det. Men seinare på kvelden kom denne nedslåande meldinga:

– Det er sluttkjørt for meg i helga, den eine vippearmen er knekt – eg må ha opp motoren når eg kjem heim!

Ingve lovar å komma sterkare tilbake under NM-runden i Vikedal søndag 9. juni, 1. pinsedag. Der ventar eit nytt møte med den unge klubbkameraten frå Vikedal, Bjørn Cato Aarekol, i tillegg til heile norgeseliten. Heile 70 crosskartar – fordelt på dei ulike klassane – er venta til Vikedal i pinsehelga.

Me kryssar igjen fingrane for vår mann, den jamnaste crosskartføraren i landet sidan tusenårsskiftet.

 

- Annonse -