Aspirantane Einar Auestad, Tomas Sandvik, Robin Skålevik, Elias Grindheim, Emma Vestbøstad opptredde offentleg for første gong. Foto: Kjetil Rydland.

Over 200 kaffitørste musikkelskarar og 70 flinke musikantar i alderen åtte til 60 år gjorde den årlege marknaden til Fitjar Skulekorps til ei feststund.

Som vanleg slutta eit takknemleg publikum godt opp då Fitjar Skulekorps bad inn til marknad i går kveld. Og det vanka mykje fin korpsmusikk, god kaffimat og mange premiar på slekt og vener som nytta høvet til å støtta det gode korpsmiljøet i bygda.

God kaffi høyrer med på ein slik marknad. Foto: Kjetil Rydland.

Konferansier Helga Rimmereid har sjølv lang fartstid i skulekorpset, både som musikant og forelder og mykje anna. Denne gongen fekk ho gleda av å presentera fem unge, lovande musikantar.

Lang fartstid har ikkje aspirantane som fekk visa kunstene sine i går. Under taktstokken til dirigent Svein Roger Koppang opptredde aspirantane Einar Auestad, Tomas Sandvik, Robin Skålevik, Elias Grindheim, Emma Vestbøstad offentleg for første gong. Og viste for all verda at det gror godt i skulekorpset.

– Dei har hatt ei fabelaktig utvikling sidan dei begynte i haust, slo dirigenten fast. Og det skjønar me godt.

Neste gong me får høyra aspirantane spela, er føre det store Disney-showet som skulekorpset skal presentera saman med Fitjar Musikklag fredag og laurdag om ei veke. Konferansier Helga Rimmereid promoterte framsyninga, og leiar i korpset, Arnhild Jordan Raunholm nytta høvet til å selja billettar.

Skulekorpset gav oss eit par smakebitar av Disney-showet. Og mange let seg nok freista, etter å ha høyrt smørsongar Ole Rørvik og Thea Træet syngja Aladdin – A Wole New World.

Etter siste runden med åresal samlast alle 70 musikantane – både frå skulekorpset og musikklaget – og publikum kunne gle seg over fleire nummer med vakker filmmusikk.
Det er tydeleg at gleda over å sjå og høyre Fitjar-musikantane i aksjon er stor blant publikum.

- Annonse -

Den trivelege stunda blei avslutta med trekning av bøkene. Her var gevinstane – som alltid – noko finare enn på åresalet. Og fleire støttespelarar kan gle seg over nyttige gevinstar: Mads Mikal Drønen fekk flybillett tur/retur Stord–Oslo, Else Hovland fekk overnatting på Clarion Hotel, og Gerd Eide fekk trafikalt grunnkurs. Alt vel fortent!

Tomas Sandvik, Robin Skålevik, Selma Anuglen og Emma Vestbøstad hjelpte Kari Prestbø med å dela ut gevinstane etter kvart som trekninga skreid fram. Foto: Kjetil Rydland.
Thea Træet og Ole R. Rørvik er solistar i Aladdin – A Whole New World. Foto: Kjetil Rydland.