Marius Pedersen og Johannes Sandvik Bø godt fornøgde etter 600 meter. Foto: Privat.

Dei unge Fitjar-utøvarane hevda seg godt under Stordleikane på Vikahaugane i dag, og som vanleg var Johannes Sandvik Bø og Marius Pedersen best, med tider heilt i noregstoppen på 600 meter.

Både Ole-Jacob Wiik, Marius Pedersen og Johannes Sandvik Bø vann sine 600-meterløp med svært gode tider, og i hard konkurranse med andre sterke løparar. Poengmessig var Johannes best med 1.31,01, ei tid som er personleg rekord med over fire sekund. Dette er ein fattig hundredel bak 1000-poengsgrensa i 14 årsklassen, og berre knappe fire tidelar bak årsbeste i landet. Der ligg Johannes no som nummer to.

Marius Pedersen på pallen etter 600 meter. Foto: Privat.

Marius Pedersen råkøyrte feltet i filler frå start og sprang inn til klar siger og tida han på førehand hadde annonsert som målet: 1.36,6. Fjorårets overmann for Marius, Amund Hella Soldal frå Uskedalen, måtte ta til takke med andreplassen denne gongen. På landsbasis har berre fem løparar i 13-årsklassen sprunge fortare på 600 meter i år .

Ole-Jakob Wiik (10) disponerte også sitt løp fint. Han angreip ved utgangen av siste sving og vann komfortabelt sin klasse på under 2 min. Maren Rydland (12) spurta inn til to fine andreplassar, på 600 meter og 200 meter.

Marius Torbjørnsen (17) viste at han har bevart forma bra gjennom sommaren. 1,72 m i høgde var nok til å sikre sigeren. Elles viste Bjart Sandvik Bø (13) framgang på 600 meter, der han persa med sju sekund til 1.57. Anna Sandvik Bø (16) gjorde ein fin figur på 100 meter. Det same gjorde Sofie Bergesen Førre, Jonas Dalen, Guro Dalen, Ola Dalen, Sunniva Wiik og Gard Sandvik Bø.

Johannes Sandvik Bø viste løpsstyrke då han berre nokre timar etter sin 600 meter også sprang inn til siger på 1500 meter, i 15-16-årsklassen i konkurranse med eldre løparar. Tida 4.31 er tre sekund bak den personlege rekorden til 800-meterspesialisten vår.

Maren Rydland på pallen. Premieutdelingane var i tråd med koronareglar om avstand. Foto: Privat.
Ungane på biletet i tribunen er bak frå venstre: Ola Dalen, Sunniva Wiik, Guro Dalen og Jonas Dalen. Framme frå venstre: Maren Rydland, Ole-Jacob Wiik og Sofie Bergesen Førre. I bakgrunnen ser me støtteapparatet frå Fitjar. Foto: Privat.