Banksjef Arve Havnerås ( i midten) startar på 60 meter. Foto: Kjetil Rydland

Dei siste dagane har både inngrodde og utflytta fitjarbuar i fleng teke idrettsmerket i regi av Fitjar Idrettslag.

Romjula er høgsesong for idrettsmerke i Fitjar, og det dårlege vêret har ikkje lagt nokon dempar verken på innsatsvilje eller prestasjonar blant idrettsfolket. Fitjar Idrettslag har hatt folk på plass på banen i Fitjar Idrettspark og kryssa av den eine sprekingen etter den andre.

Vakthavande idrettsmerkeoffiser i dag, Finn Ingvar Havnerås, fortel at i går var det seks kandidatar som kom gjennom nålauga. I dag stilte storfamilien Havnerås, frå Fitjar, Stord og endå større byar, på startstreken. Saman med enkelte heilt lokale blei det i dag sju kandidatar som klarte idrettsmerket.

Som vanleg gir ikkje Fitjar Idrettslag opp idrettsmerkesesongen før fyrverkeriet fresar og nyttårsklokkene ringjer. Finn Ingvar Havnerås fortel at det blir ein ny sjanse for etternølarane på nyttårsaftan.

Me ber difor denne oppmodinga vidare: Still opp i Fitjar Idrettspark tysdag 31. desember klokka 12!

Det er kjekt å ta idrettsmerket i all slags vêr, synest storfamilien Havnerås. Foto: Kjetil Rydland.