Mange vart frakta opp med helikopter. Foto: Kjetil Rydland.

Over hundre strandarar og andre fjellfolk i alle aldrar fann vegen til Tindaslottet søndag.

Sola skein om kapp med Geirmund Engevik og over hundre gjester på Tindaslottet søndag. Av desse var det førti som nytta høvet til å ta helikopter opp til toppen på 585 meter over havet, frå bakken på Raunholm. I alt 56 kom til fots, og ingen hadde vanskar med å finna vegen, etter at den blei merkt i fjor. Saman med ein velkomstkomite på åtte personar blei det altså over hundre menneske på Tindaslottet søndag.

Av dei luftborne var Lidvald Stubhaug med sine 90 år eldstemann. Yngst blant helikopterpassasjerane var Liv Hanna Raunholm på seks år. Ho blei fødd den dagen for seks år sidan då dei sist bad bygdefolket på Strando til fjells med helikopter. Dagens tur var meir annonsert, men også denne gongen var brorparten av passasjerane strandarar, fastbuande og utflytta. Ikkje få 80-åringar frå bygda nytta høvet til å fyka til fjells på to og eit halv minutt.

Og frå Bergen kom «onkel Olav» – Olav Raunholm – som ifølgje Geirmund Engevik har mykje av æra for at det har blitt ei hytte på Tindane. I si tid hadde han eit aldri så lite krypinn av stein, eit par fjøler og presenning der Tindaslottet no ligg. Og det var son hans, geologen Ståle Raunholm, som skulle opp med boreutstyr då Geirmund såg høvet til å frakta opp bjelkane og andre tunge materialar til den nye hytta. Når ein først hadde helikopter likevel, burde ein nytta høvet til å ta med meir enn dei hundre kiloane med utstyr til geologen. Helikopteret kunne jo ta ei nyttelast på over eit tonn … Og som sagt så gjort, og dermed var prosjeketet i gang. Geirmund fortel at dugnadsturane var minnerike opplevingar, ofte med rundt tretti deltakarar.

På bakken til Jenny Raunholm stod kyndig personell og sørgde for at passasjerane kom vel om bord i helikopteret frå Airlift i Kinsarvik. I puljer på fem om gongen kom dei opp til den fine landingsplassen like sør for Tindaslottet, Der stod Geirmund Engevik, Arne Raunholm m.fl. og tok imot; fleire måtte hjelpast ut av helikopteret. Og det var berre godord å høyra; alle hadde hatt ein strålande tur. Ingen høyrdest ut til å vera skeptiske til å fyka. Som ein av dei yngste passasjerane, Torstein Raunholm Kjelling, sa det: «Gamlisane ville ha det gøy». Og gøy hadde dei det.

Av dei 56 som kom opp stien var 15 månader gamle Maren Rydland den yngste. Ho kom på skuldrene til far sin, ordførar Harald Rydland, som spelte trekkspel til allsongen på «appellplassen». Sjølvsagt stod «Mellom bakkar og berg» på programmet. Men den slo nok ikkje den vakre, tostemte framføringa av «De nære ting» av Synnøve Levåg og Kari Raunholm, også den til tonefølgje av Harald Rydland. Eit anna flott kulturinnslag var diktet «Tindane» av Ivar Orgland, framført av 90-åringen Lidvald Stubhaug.

I slikt strålande ver er kanskje alt kjekt. Men det var nesten rørande å oppleva den gode stemninga. At slike prosjekt er oppbyggelege for samhald og identitet er det liten tvil om. Ein slik dag er eit minne for livet, både for unge og gamle.

Mange vart frakta opp med helikopter. Foto: Kjetil Rydland.

90 år gamle Lidvald Stubhaug var eldstemann på toppen. Foto: Kjetil Rydland.
90 år gamle Lidvald Stubhaug var eldstemann på toppen. Foto: Kjetil Rydland.
Stas med helikopter. Foto: Kjetil Rydland.
Stas med helikopter. Foto: Kjetil Rydland.
Tindaslottet. Foto: Kjetil Rydland.
Tindaslottet. Foto: Kjetil Rydland.