Fitjar-juniorane til A-sluttspelet etter 1-0 mot tyske Rantrum onsdag ettermiddag.

Onsdag ettermiddag spela gutane ein ny god kamp, og vann puljen sin etter ei scoring av Leif Tore Aarland på slutten av 2. omgang. Øyvind fyks Lie var på plass igjen på midtbanen, og spela ein ny glimrande kamp for Fitjar. Men han var ikkje einsleg svale; heile laget spela god fotball kampen igjennom, og var nok det strået kvassare som resultatet viser.

Me har sett desse gutane spela mange gode fotballkampar, men sjeldan her me sett dei spela jamt god fotball i kamp etter kamp heile tre kampar til ende. Men denne gongen har dei halde eit stabilt høgt nivå frå første spark på ballen, og det var fullt fortent at dei kom seg vidare til A-sluttspelet som puljevinnarar.

Å trekkja fram fleire enkleltspelarar er kanskje ikkje det enklaste etter desse tre kampane, og heller ikkje om å gjera. Styrken til laget denne gongen har vore at alle har halde eit bra nivå heile vegen, utan særlege downperiodar. Trenar Ketil Fykse hadde ikkje heilt rekna med at dei skulle vinna puljen, og han er svært fornøgd med innsatsen. I siste kampen gjekk Konnerud på eit tap for det danske laget Harken, så Fitjar hadde gått vidare til A-sluttspelet uansett resultat mot tyskarane. Men det er sjølvsagt ekstra stas å bli puljevinnar.

I morgon kl. 12.10 ventar nr. 2 i pulje 6, Steinkjer FK, til 16-delsfinale i FREM-Parken. Måtte den positive trenden halda fram.