Det går mot eit sensasjonelt comeback på A-laget til Fitjar for Åsmund Sørfonn.

Etter mange baklengsmål i det siste var gode råd dyre for A-lagstrenar Kjell Træet. To av dei faste forsvarsspelarane til Fitjar tedde seg som bukkar på Rubbestadneset førre helg, og holet i midtforsvaret har blitt større enn nokon gong.

Det er derfor med stor glede Kjell Træet kan melda at ei gammal stjerne er nypussa og klar til å skina på ny. Den gamle stjerna heiter Åsmund Sørfonn, ein mann som har spelt hundrevis av kampar på A-laget til Fitjar. Han debuterte allereie i 1990, som 16-åring. Seinare blei det overgang til Stord, før han kom tilbake til Fitjar. Og her har han vore med og spelt A-laget opp i 3. divisjon fleire gonger. 

Åsmund fortel til Fitjarposten at han har halde treninga godt ved like. Han trur ikkje han vil få problem med tempoet i 5. divisjon, og reknar med å gå rett inn på laget.