16.4 C
Fitjar
tysdag, 25. juni 2019
- Annonse -
Heim Nyhende Fitjarposten-arkiv Terner i pinsedans

Terner i pinsedans

142
Tednedans i Havn på pinstiafto. Foto: Kjetil Rydland.

Makrellternene i Havn nytta pinsehelga til å para seg, og me får vona det gir resultat, sjølv om dette er litt seinare enn vanleg.

– Ja, det kan gå bra, sjølv om egglegginga normalt skjer i siste halvdel av mai, sier naturfotograf og fuglekjennar Jan Rabben i ein kommentar.

Rugetida er om lag tre veker, og så går det vel tre veker til før ungane flyg. Dermed kan det vera flygedyktige terneungar i Havn før 1. august. Dette er altså ikkje for seint. Rabben minner om at i Nord-Noreg kan ternene venta heilt til starten av juli før dei legg egg.

Tida skulle altså ikkje vera det største problemet for ternene våre. Det gir større grunn til uro at dei er så få. Dei har større sjanse for å lukkast når dei hekkar i store koloniar. Eitt einskilt par er veldig sårbar for ulike fiendar som vil røva reiret eller eta opp ungane.

Ternene er typiske langdistansetrekkfuglar, og er i Noreg frå mai til juli/september. Makrellterna (Sterna hirundo) er den vanlegaste av ternene i Noreg. Dei som har funne vegen til Havn, har reist langt for å ruga fram ein ny generasjon, heilt frå dei sørlege og vestlege delane av Afrika.

Me er litt skeptiske, men kryssar fingrane for at pinsedansen skal gi resultat.

Desse to makrellternene har vore i Havn sidan tidleg i mai. Foto: Kjetil Rydland.
Tedneskrik på bryggja i Havn. Foto: Kjetil Rydland.

 

- Annonse -