Dei første ternene er på plass i Havn. Foto: Kjetil Rydland.

Den siste veka har den kjende sommarlyden frå makrellterna kome tilbake til Fitjar, og i dag stilte dei første ternene endeleg opp til fotografering i Havn.

Ingen fuglelyd ved sjøen er vel så sterkt knytt til sommar som den spesielle vellyden frå terna. Makrellterna set sitt preg på stemninga i Havn med sin karakteristiske krrrii-krrrii, men førebels har me berre sett to terner.

Det er altfor lite til å lukkast med hekkinga. I mai for to år sidan skreiv me på Fitjarposten artikkelen Terneungar i år og? etter å ha sett paringsakta til eit ternepar.

Fuglekjennar og naturfotograf Jan Rabben frå Stord var ikkje like optimistisk, og helte litt kaldt vatn i blodet på oss. Han tvilte på om eitt einsleg par hadde sjanse til å lukkast.

I fjor var det ein del fleire terner enn tidlegare år, både i Havn og andre stader i området vårt. Derfor var me ein smule optimistiske. Men to stakkars terner er altfor lite, og me håpar fleire dukkar opp før hekkesesongen startar for alvor.

Her stuper terna ned og fangar ein liten fisk. Foto: Kjetil Rydland.