Bergensaren Bjørn Tore Taranger vann Fitjar halvmaraton overlegent i dag, men fleire lokale løperar merka seg og ut blandt dei rekordmange deltakarane.

Dette var den 12. gongen at Fitjar halvmaraton vart gjennomført, i regi av friidrettsgruppa i Fitjar idrettslag. Trass dårlege vermeldingar og ausregn tidleg på dagen gjekk løpet føre seg i fint opphaldsver med ca. 20 grader i lufta. Gateløpet, som er 21,098 km langt, starta i Fitjar idrettspark, gjekk så til Årskog, snudde der, for så å ta vegen rundt Storavatnet via Vestbøstad. 38 løparar, derav 5 lokale, stod klare på startstreken då Rolf Vik i arrangementskommiteen avfyrde startskotet presis klokka 13.00.

Allereie ut frå stadion låg Taranger i leiing. Han skapte raskt ei luke bak seg, og var åleine i fortroppen gjennom heile løpet til han passerte mållinja i einsleg majestet på tida 1.20.16. Harald Engevik frå Fitjar låg godt an i starten, og låg lenge på tredje plass, men måtte sjå seg forbigått av ein sterkare konkurrent eit par kilometer før mål. For mange er den siste beten frå Vik og opp brekka i Hungersdalen ein ekstra styrekprøve, og her skjer det ofte endringar, kan leiar i idrettslaget Elin Siglen fortelja.

Det var drikkestasjon etter kvar 5 kilometer. Ca midt i løpet, ved krysset til Koløyholmen, var det stasjon med saft og banan i tillegg til vatn. Her stod ein av fleire frivillige, Finn Ingvar Havnerås, for å gje løparne høve til å fylla på med ny energi og oppmuntra alle og einkvar til å stå på vidare. Halvvegs i løpet låg Tor Henning Vestbøstad og Roar Pedersen godt an, og Fitjar hadde ein lang periode 3 av sine løperar blant dei 6 første. Sjølv om alle rykte litt nedover resultatlista til slutt var dei godt nøgde med sine løp og mange fleire enn vinnaren i herreklassen kunne gle seg over ny personleg rekord.

Vinnar i dameklassen vart Janne Elin Vatnaland frå Bokn IL som deltok i Fitjar halvmaraton for første gong. Ho hadde eit godt forsprang på dei andre 7 damene som deltok og kom i mål over 12 minutt før sine argaste konkurrentar Bodil Mjelkevik og Irene Kjønnerød.

Øyvind Skålevik, og resten av gjengen i arrangementskomiteen, var svært godt nøgd med den rekordstore deltakinga. I 2009 deltok 25 løperar, i år var det ny rekord med heile 38 løparar. Arrangørane gledde seg og over ein del nye andlet i løypa. Det einaste saknet måtte vera at det ikkje var med kvinnelege deltakarar frå Fitjar.

Fitjar halvmaraton er ingen stor publikumsmagnet, men nokre tilskodarar hadde funne vegen til idrettsparken og nokre fulgte med på løpet ulike stader i løypa.

Etter endt løp var det nedspringing, servering av vatn, saft, pølser i brød og kake, ispedd drøftingar av løpet. Det heile vart avrunda med premieutdeling til dei tre beste i dameklassen og dei tre beste i herreklassen, i tillegg til at det var utdeling av vandreskjold. Vandreskjoldet vert gjeven til den som får best poengsum for sitt løp når tida vert sett i forhold til alder og kjønn. I år, som i 2 år tidlegare, var det Bodil Mjelkevik frå Haugesund IL som vann vandreskjoldet. Med dette tredje nappet i skjoldet fekk ho det i dag med seg heim til odel og eige.

Før me presenterer resultatlista er det på sin plass, for oss som berre stod på sidelinja, å påpeika at i dette løpet var det 38 vinnarar, som alle kom seg gjennom den lange og tøffe asfaltløypa på 21098 m. på ein verdig måte!

Resultatliste for Fitjar halvmaraton søndag 1. august 2010:

Damer Navn Klubb Tid

1 Janne Elin Vatnaland Bokn IL 1,37,09

2 Bodil Melkevik Haugesund IL 1,49,44

3 Irene Kjønnerød noteam 1,50,26

4 Kari Nilsen Stord IL 1,58,05

5 Martina Koenig Haugesund IL 2,00,15

6 Agnes Grutle Grande ProsessPartner 2,05,14

7 Gunhild Haukeland Haugesund IL 2,16,51

8 Hilde Vikse Lie noteam 2,31,36

Menn Navn Klubb Tid

1 Bjørn Tore Taranger Bfg Fana 1,20,16

2 Jan Birger Hansen Haugesund IL 1,22,56

3 Henrik Trumpy Bfg Fana 1,26,03

4 Harald Engevik Stord IL 1,26,50

5 Wiktor Berg Sveio IL 1,28,43

6 Tor H. Vestbøstad Fitjar IL 1,29,14

7 Per Gunnar Alfheim Bfg Fana 1,29,43

8 Sigmund Pedersen Sveio IL 1,30,06

9 Roar Pedersen Fitjar IL 1,30,28

10 Arild Rolfsnes noteam 1,33,06

11 Sjalg Duesund IF Klypetussen 1,36,39

12 Per Morten Rennan DnB NOR 1,36,38

13 Richard Brande noteam 1,40,18

14 Knut Evjen Kvinnherad Kommune BIL 1,40,37

15 Magne Skumsnes Fitjar IL 1,42,00

16 Dan Torbjørnsen Fitjar IL 1,43,22

17 Peter Tubaas ABB 1,44,12

17 Berner Innvær Moster IL 1,44,12

18 Ola Malvin Lomheim Stord IL 1,45,49

19 Jon Andreas Folgerø-Holm Moster IL 1,46,31

20 Øystein E. Eskeland Stord IL 1,48,54

21 Svein Rasmussen Kondis 1,49,08

22 Vegard Alme Ulstein Multiconsult BIL 1,49,23

23 Anbjørn Høivik Kvinnherad Kommune BIL 1,56,34

24 Gunvald Gundersen IF Klypetussen 1,55,57

25 Jan Arve Klungtveit Statoil 1,57,02

26 Kaspar Zwicky Haugesund IL 1,57,32

27 Steinar Øen Tertnes IL 2,05,39

28 Simon Innvær Moster IL 2,11,49

30 Wiktor Jansen Haugesund IL 2,13,14