Ordførar Harald Rydland og rådmann Olaug Haugen ville i dag gje stor heider til dei som arbeider på Fitjar bu- og behandlingssenter, for å ha vist handlekraft i ein krevjande situasjon.
Det vart den 20.03. oppdaga smitte av koronavirus hos ein tilsett på sjukeheimen. Alle dei 10 som bur på somatisk avdeling vart sett i karantene på romma, medan fleire av dei tilsette måtte i heimekarantene. Dette førte til ein svært utfordrande situasjon, både for å få nok folk på jobb, og for å hindra smittespreiing.
I går kunne me melda om at ingen på avdelinga synte symptom på at dei er koronasmitta, og smittevernlege Odd Jarl Kvamme fortalde at bebuarane hadde det fint.
Blomar og heider
– Etter ein krevjande periode med karantene og ekstraordinært smittevern har ingen av dei som bur på sjukeheimen fått symptom på koronasmitte. Og i dag er karanteneperioden over. Dei som arbeider på sjukeheimen, med Iren Hamborg og Kari Bjelland Vik i spissen, likeeins smittevernlege Waleed Brisam og helsesjef Anne Økland, har utført ei bragd som har fått dette til, skriv ordførar Harald Rydland i ei pressemelding.
Han og rådmannen vitja i dag FBB og gav blomar og lovord til dei tilsette på bygget.
– Fitjar kommune vil retta ei stor takk til dei tilsette som har vist effektiv og profesjonell handlekraft, kreativitet og engasjement i denne alvorlege situasjonen, sa rådmann Olaug Haugen.
Ho takka dei tilsette for at dei var snarrådde i ei veldig krevjande stund. Einingsleiar Iren Hamborg og avdelingsleiar Kari Bjelland Vik tok i mot blomane.
– Klemmar får de få seinare, spøkte ordføraren.
