Jentelaget fekk ei flott opning av kampen mot Bønes 2, men måtte likevel sjå gjestene reisa heim med ein 4-3-siger.

Fotballen har ikkje akkurat rulla jentene våre sin veg denne sesongen, og dei har grunn til å vera ein smule skuffa etter kveldens nederlag. Årets siste seriekamp enda med tap, trass i ei flott opning.

Allereie etter 10 minutt av kampen stod det 2-0 til Fitjar-jentene mot Bønes 2. Begge måla kom etter corner. Det første heada Oda Rydland i mål; det andre var eit knallhardt skot av Malin Westvik.

Etter den flotte innleiinga kom gjestene frå Bønes meir med i kampen. Og mot slutten av første omgang hadde dei utlikna til 2-2.

I andre omgang hadde Fitjar mesteparten av spelet, og eit utal sjansar til å gå opp til 3-2. Men litt mot spelets gang scora Bønes to gonger, før Silje Rydland gjekk gjennom heile Bønes-forsvaret og fastsette sluttresultatet til 3-4.

Dermed måtte jentene tola eit nytt tap, i ein kamp der dei så absolutt hadde fortent poeng.

Fitjar stilte med dette laget:
Ingrid Tveita, Tone Brakedal, Oda Rydland, Silje Rydland, Emilie Helland, Malin Westvik, Lisa Volden, Martine Stokken, Henriette Tranøy, Ingrid Bergesen, Vilde Vestbøstad, Malin Tislevoll, Zandra van Bree, Ailin Vik, Malene Solli, Frida Hatlevik.

Ingressbilete: Banens beste var Oda Rydland som scora mål og dominerte i midtforsvaret til Fitjar. Foto: Kjetil Rydland.