Fitjar såg ut til å halda fram flyten frå dei siste kampane og leia 3-0 i fredagens heimekamp, før gjestande Frøya snudde kampen og vann fortent 5-3.

Gjestene frå Bergen mangla fleire sentrale spelarar til møtet med Fitjar i idrettsparken fredag ettermiddag, og verka heilt ufarlege i byrjinga av kampen. Dei entra banen til oppvarming berre eit kvarter før avspark, og Fitjar opna kampen klart best. Frøya-spelarane såg ut til å ha meir enn nok med å halda balansen på det våte Fitjar-graset.

Etter fleire fine forsøk av Fitjar i opningsminutta var det berre rett og rimeleg at Thomas Vestbøstad Waage kunne gi heimelaget 1-0 etter 12 minutts spel. Han fekk ei fin pasning utanfor hjørnet av 16-meteren, runda oppassaren sin og skaut kontrollert til side for keeper med venstrefoten. Berre to minutt seinare var det klart for 2-0, då Jonas Tislevoll møtte eit fint innlegg frå Badi Hurasi, og sette ballen i mål frå tre meters hald.

Frøya kom ikkje i gang med noko spel før halve omgangen var gått, og ingen såg for seg at dei skulle koma tilbake i kampen. Fitjar kontrollerte det meste, hadde det meste av sjansar, og gjekk heilt fortent opp til 3-0 ved Helge Træet på eit flott skot frå 25 meter. Også denne gongen var Badi Hurasi og Jonas Tislevoll sterkt delaktige. Jonas opna forsvaret med eit fint raid på tvers, før ballen hamna hos Badi, som slo utover til ein fremadstormande Helge Træet.

Etter ein første halvtime som var for god til å vera sann, såg me ikkje for oss at slappe Frøya-spelarar skulle komma tilbake. Men når noko er for godt til å vera sant, så er det vanlegvis nettopp det. Frøya reduserte etter 31 minutt ved Johan Fredrik Kvalheim etter klare feil i Fitjar-forsvaret. Og forsvarsspelet var eller ikkje patent 10 minutt seinare, då Daniel Halseth kunne redusera til 3-2.

Frøya hadde brukt første halvtimen til oppvarming, og avslutta omgangen sterkt. Me hadde derfor ikkje akkurat godkjensla då laga gjekk til pause med leiing 3-2. Me ante at her kom til å bli fleire mål.

Og andre omgang var berre to minutt gammal då Øyvind Fykse var uheldig og gav gjestene straffespark. Den sette Mika Mykkeltvedt kontant i mål, og få minutt seinare hadde Frøya snudd kampen.  3-4 kom ved Sondre Dybsland som fekk ein retur ut i feltet, og kunne scora sikkert. Men Fitjar-forsvaret burde ha klarert lenge før ballen kom dit. Heller ikkje ved det siste målet til Frøya var Fitjar-forsvaret patent. Etter eit par pinlege feil av forsvaret kunne Anders Lunde gi gjestene 5-3.

Dermed måtte Fitjar svelgja heile fem baklengsmål på heimebane, i ein kamp som starta med flott angrepsfotball. Med tre flotte mål heime skal det gå an å kapra poeng. Men då må forsvaret vera betre organisert enn denne gongen. Ved enkelte høve verka  forsvaret direkte sløvt, og gjorde heilt elementære feil.

– Eg har sjeldan følt meg så tom etter ein kamp, seier trenar Kjell Træet til Fitjarposten. Det er ikkje vanskeleg å vera einig. Dette var ein kamp der A-laget burde slite seg til poeng etter den flotte opninga. Men då må forsvarsspelet sitja, og det gjorde det ikkje. Bestemannspremien gjekk til Kjell André Thorland, men denne gongen kan han gjerne dela middagen med Jonas Tislevoll eller Helge Træet.


Jonas Tislevoll jobba godt både i forsvar og angrep og scora mål, og hadde fortent både poeng og middag etter fredagens innsats. Foto: Kjetil Rydland.

Fitjar – Frøya 3-5 (3-2)
Seriekamp 4. divisjon, menn
Fitjar Idrettspark, fredag 28. august
Publikum: 100
Dommar: Bjørn-Ketil Olsen, TIL Hovding

Mål: 1-0 Thomas Vestbøstad Waage (12), 2-0 Jonas Tislevoll (14), 3-0 Helge Træet (29), 3-1 Johan Fredrik Kvalheim (31), 3-2 Daniel Hallseth (41), 3-3 Mika Mykkeltvedt (48), Sondre Dybsland (51), 3-5 Anders Lunde (65)

Gult kort for Fitjar: Jonas Tislevoll og Badi Hurasi

Fitjar sitt lag:
Oddgeir Træet, André Helland (Nils Ingar Tislevoll 67), Emil Fitjar (Thomas S. Koløen 87) Torbjørn Korsvik, Sander Tverborgvik (Adrian Mehammer 67), Helge Træet, Øyvind Fykse Lie, Kjell André Thorland, Badi Hurasi, Jonas Tislevoll (Mats Westvik 84), Thomas Vestbøstad Waage (Sebastian T. Thomassen 77).