Fitjar-juniorane gjekk på ein skikkeleg smell mot Smørås søndag kveld, og måtte sjå 6 ballar bak keeper Vidar Vestbøstad før motstandarane reiste heim att til Bergen. Starten på kveldens kamp såg brukbar ut, trass i forfall frå fleire av dei sentrale spelarane på laget. Smørås såg ut til å vera ein overkomeleg motstandar, og me kunne augna eit visst overtak for Fitjar i byrjinga av kampen. Men to relativt billige Smørås-scoringar tidleg i 1. omgang øydela mykje. Fitjar var spelemessig minst like gode som motstandarane sine i lange periodar, men kva hjelper det når dei ikkje klarer å scora?
Hjelpte gjorde det definitivt ikkje at dei fekk utvist midtstoppar Martin Vestbøstad tidleg i 2. omgang for ei felling inne i straffefeltet. Keeper Vidar Vestbøstad gjorde rett nok to gode redningar, etter at Smørås-spelaren fekk to sjansar frå straffemerket. Dermed heldt han Fitjar inne i kampen i det lengste. Men dei siste 20 minuttane blei dystre for Fitjar-juniorane. Mot tre mann i forsvaret til heimelaget fekk gutane frå Smørås etter kvart god plass, og det rann inn fire stygge mål på slutten, slik at tapet blei heile 0-6.
Som vanleg spela Kjell André Thorland ein god kamp på midtbanen. Men det nytta lite ein kveld då marginane ikkje var på Fitjar-gutane si side.
