Barnekoret syng På Golgata. Foto: Rune Longfjeld Rimmereid

Ein stor flokk med  strålande blide og kjekke fitjarbuar naut snø og strålande sol på Helgatun denne helga.

Soknerådet arrangerte i år for 4. gong tur til Helgatun i Myrkdalen første helga etter påske. Sola skein frå så godt som skyfri himmel heile helga, og sjølv om me nærmar oss mai og det var god temperatur i lufta var det fortsatt rikeleg med snø til å boltra seg i. Desse turane har vorte svært populære og turen i år fullteikna mest med det same det vart opna for påmelding. Heile 99 små og store hadde fått plass, og her var folk i alle aldrar frå babyar, ungar, ungdomar og vaksne til svært godt vaksne.

Mange hadde venta lenge på denne helga, og ein god del tok seg ein ekstra fridag og satte kursen oppover forbi Voss allereie tidleg fredag morgon. På Helgatun vart ein motteken med sjokolade på senga og flotte namnelappar på dørene. Sola skein om kapp med forventingsfulle og snøhungrige fitjarbuar, så her var det berre å pakka fram solkrem, solbriller, ski, skismøring, akebrett og eventuelt solstol.

Det meste av dagane var satt av til å nyta snø og sol, men det var og nokre samlingar inne. Fredag kveld var det ei enkel bli-kjend-samling og ei kvelsbøn, før det var kaffikos med gode kaker medbragt frå Fitjar. Laurdag føremiddag var det laurdagsskule for ungane, i to aldersdelte grupper, og ei eiga samling for dei vaksne før me tok snøen i bruk. Etter hektisk aktivitet, påkledning, pakking av dagstursekkar og litt småkrangling og kjefting på romma for å få alle kjapt ut av dørane var alle klar for ulike aktivitetar. Ungdomane og ein god del andre nytta seg av det flotte alpinanlegget som ligg like ved Helgatun. Andre sverga til langrenn og tok seg anten ein tur til Vikafjellet eller i lysløypa på  andre sida av vegen. Atter andre aktiviserte seg i akebakken rett bak husa, anten på akebrett, på snowboard eller på ski. Det var mykje glede og spenning å spora alle plassar, og spesielt i akebakken og i nedfarten frå setrane på andre sida av vegen runga gledeshyla titt og ofte, og ungar og vaksne strålte om kapp med sola.

Etter ein god dusj og ein bedre middag var det samling i peisestova. Laurdagsunderhaldninga var det to damer frå Sunnmøre og ein kar frå Rydland som stod for. Alle vart engasjert og lotten sat laust. Kvelden vart avslutta med ein enkel kveldsliturgi og kaker.

Søndag føremiddag var det ei kort familiegudsteneste der Roald Drønen snakka om Jesus som har merker i hendene sine, merker som syner kva han har gjort for oss. Kvar einskild av oss er teikna i desse merka, sa Roald. Den yngste gruppa med ungar, dei frå 0 år til og med 3. klasse opptrådde med flott song. Guro Rimmereid, Ingvild Prestbø og Kristi Rydland spelte kornett, og Tom Rydland avslutta gudstenesta med songen Eg skulle gjerne tru at nokon har meg kjær. «… For i min lengt eg vonar på at eg skal få den tru eg ikkje sjølv kan nå.»

Så kalla snøen på oss igjen, og dei fleste var raskt på plass ute i løypene. Det var få sure miner å spora, sjølv om ikkje alle kunne ha «dagen» kvar dag. Det tar på å ta seg slik ut og å utnytta kvart eit minutt.

Stor takk til Randi Brekke, Roald Drønen og Olav Johannes Oma som sat i turkomiteen og hadde lagt alt så fint til rettes for oss. Takk og til dei som så velvillig hadde bakt alle dei gode kakene og alle andre som bidrog på ulikt vis.

På ferja heim vart det sagt at dette er ei slik oppleving som det er vanskeleg å beskriva og som ein berre bør oppleva. Me kan lova nye turar, men me kan dessverre ikkje lova det same strålande veret kvar gong. Neste kyrkjelydstur til Helgatun vert 9.-11. april 2010, men det er ikkje opna for påmelding enno…..

Barnekoret syng På Golgata. Foto: Rune Longfjeld Rimmereid

Familiegudstenesta vart avslutta med Deg være ære. Foto: HR
Familiegudstenesta vart avslutta med Deg være ære. Foto: HR