Veret synte seg frå si aller beste side, og sytte for perfekte rammer rundt Hatlevikbasaren i Fitjarøyane , som vart arrangert i helga.

Folk strøymde og til frå alle kantar, og talde me til 900 i fjor, må det ha vore nærare 1000 menneske til stades i år.

Høgste bodet denne gongen var på ei nydeleg skipskiste som ein av Eidesvikane kunne henta med seg for 15 000 kroner. Eivind Grasdal var ny auksjonarius og klarte seg godt.

Prost Arne Theodorsen held ein folkeleg andakt over temaet ”Midt i nattens mørke blinker som eit fyrlys Jesu navn”. Han held òg vakre minneord over avlidne Aksel Kloster som var auksjonarius på Hatlevikbasaren heilt fram til i fjor.

I skrivande stund veit me ikkje kor mykje som kom inn. Men at Rasmus og Salomon Hatlevik kan senda godt over 100 000 kroner til Den indre Sjømannsmisjon og ”Elieser 6”, er me ikkje det minste i tvil om.