Temakveldgruppa inviter til ny spennande hending i Fitjar Kyrkje.

Koret Grex Vocalis, under leiinga av Carl Høgset, vitjar Fitjar den 31.mai. Det Oslobaserte koret har halde på sidan 1971, og har etablert seg som eit av dei leiande kammerkora i Noreg.

Koret har hatt internasjonale musikalske interesser og ambisjonar. Varemerket til Grex Vocalis er den spesielle, homogene klangen som har kjenneteikna dei sidan første plateutgjeving.

Grex Vocalis har turnert mykje både i Noreg og Europa, og har besøkt Japan og Cuba. Koret har vunne tre Spellemannsprisen, fyrstepremie i nasjonale og internasjonale korkonkurransar, gitt ut ti plater og medverka på enda fleire.

Det er aller første gong koret syng i Sunnhordland, og truleg ogso den siste gongen! Koret er nemleg inne i sitt siste år, og dette er den siste turneen dei gjer i Noreg.

– Me ser fram til ei koroppleving av dei sjeldne, og håpar mange korvener og songarar vil koma og dela kvelden med oss, fortel Eli N. Simonsen på vegne av Temakveldgruppa.

Konserten startar kl.19.30, og dei som tek turen får høyra koret framføra musikalske høgdepunkt frå mange ulike epokar, og av utanlandske og norske komponistar, som t.d.  G.P. da Palestrina, Arne Nordheim, Giuseppe Verdi, Edvard Grieg, Felix Mendelssohn- Bartholdy og Trond Kverno, for å nemna nokon.

I tillegg kjem Stordkoret Corona på besøk, og deler konserten med Grex Vocalis.

- Annonse -

Billettar kan ein kjøpa i døra, eller førehandsbestilla hos Hildegunn Aadland på tlf.: 95138011.

Temakveldgruppa ved Fitjar Kyrkje ynskjer alle velkomen!