Fitjar klarte å halda 1-1 etter første om gang mot Stord. Men i andre omgang rakna det fullstendig. Sluttresultatet vart 6-1 til Stord.

-Vi blei regelrett rundspelt. No får me berre gløyma denne kampen snarast mogleg, og reisa oss igjen, seier assistenttrenar Ketil Fykse etter kampen.

Fitjar sitt mål vart skåra av Gjert Ståle Olsen, og Helge Træet vart kåra til Fitjar sin beste spelar.

Her er Agnar Aarskog sin kommentar:

Stortap mot Stord
Fitjar fekk bank av storebror i sør i kampen mellom Fitjar og Stord på laurdag.  Stord var beste lag frå start til slutt, og dei vann fortent 6 – 1.
Sjølv om Fitjar heldt Stord til 1 – 1 ved pause, var nok det resultatet noko flatterande i høve spel og sjansar.  Men det rakna for Fitjar litt ute i andre omgang, slik det har gjort i dei siste kampane og i løpet av 5 minutt scora Stord 3 mål, sjølv om det eine straffesparket dei fekk var av den svært billege sorten.

Det unge Stordmannskapet hadde svært god rørsle og laget og vart teknisk svært gode.  Dei spela på heile sitt register og sprang eit svakt Fitjar lag i senk.

Skal Fitjar klara å overleva i 3 divisjon må innsats og trøkk opp fleire hakk.  Men nye sjansar kjem alt neste laurdag då dei skal møta Bremnes som er eit av botnlaga.