Torleif Solli glir lett forbi Morten Storesund i spurten, men må innsjå at Christer Meyer er i ferd med å gå over mål. Foto: Kjetil Rydland.

Torleif Solli frå Fitjar sykla inn til andreplassen i Stord rundt i dag, etter ein god spurt, som kom ørlite for seint.

I spurten kunne det sjå ut som om Torleif hadde meir på lager, noko adrenalinbrølet over målstreken òg bar bod om.

Sjølv Stadfestar Torleif at han var veldig nær ved å vinna, og gjenta fjorårsbedrifta:

– Eg starta spurten akkurat litt for seint, og nådde ikkje heilt fram, seier Torleif Solli sjølv om innspurten i Prestagardsskogen i dag.

Han kom eit par sekund for seint til å nå igjen Christer Meyer frå Åsane, som vann konkurranseklassen i årets Stord rundt på tida 1.30,42. Torleif kom i stor fart bakfrå, og hadde ingen problem med å gli inn til andreplassen.

Etter løpet rosar Torleif lagkameratane frå Stord, som han meiner hjelpte han fram. Særleg vil han trekkja fram ein av dei unge stordabuane, 17 år gamle Marcus Kvarme. Torleif fortel at han hadde det kjekt undervegs rundt Stordøya, men han ergrar seg litt over at det ikkje heldt heilt inn.

Hadde han starta spurten litt før, er han sikker på at han hadde vunne. Men han hadde ein Åsane-ryttar på hjulet, og var redd for at han skulle gå forbi dersom han starta spurten for tidleg. Denne Åsane-ryttaren sleppte då Torleif spurta, men det kunne ikkje Torleif vita.

Dermed måtte Torleif innsjå at han miste sigeren på at han forrekna seg litt i spurten. For den andre «kanonen» frå Fitjar, Stein Helge Simonsen, blei det ingen sportsleg suksess i dag. Han har ikkje førebudd seg så godt som han helst ville, og kom eit godt stykke bak i køen. Vel 40 sekund bak sambygdingen og rivalen Torleif Solli kom Stein Helge inn på 29.-plass.

Ein annan gammal fitjargut, derimot, gjorde det svært så bra. Stord-lensmannen Roald Raunholm gjekk heilt til topps i trimklassen, ein prestasjon som var over all forventning. Svein Inge Aarskog imponerte ikkje mindre, med tida 1.56,41, og Svenn Skumsnes kom inn på 1.57,11.

Me gratulerer med dei sterke prestasjonane. Komplette resultat finn du på denne linken til EQ Timing.