Eimen av nysteikte kakemenn møtte oss i døra då me stakk innom i dag.

Kven kunne tru at over 50 born og ein del vaksne var samla til juleverkstad? Det var utruleg stille og god stemning ved dei mange borda der noko føregjekk, både i hovudetasjen og kjellaren. Juledekorasjonar, kort, talgalys og julegåver vart produserte i ulike fasongar og fargar, og borna var stolte av det dei laga. Den store kakemanndeigen på kjøkkenet vart kjevla og trykt ut til mange slags figurar. Mest truleg gjekk vel noko av deigen rett i «langholk» som nokon kallar det. Etter ei god arbeidsøkt var det tid for risengrynsgraut, saft og kaffi, og då minka det veldig i kakehaugen; det var slik det skulle vere. Gro Rydland heldt andakt og det vart tid til litt song. I det alle gjekk heim, vart det minna om adventssamling på bedehuset i morgon kl 10.00. Då er alle hjarteleg velkomne til frukost. Tysdagsklubben og Indremisjonen arrangerer i lag.