Søndag 15. september inviterer Corona og Vokalensemblet Skrik til ei stemningsfylt og variert koroppleving i Nysæter kyrkje på Stord. Her er òg fitjarbuar med.

Corona vart kjent med Vokalensemblet Skrik i den sjarmerande Italienske byen Riva del Garda, der begge kora deltok i den internasjonale korkonkurransen Musica Mundi i 2011. Skrik oppnådde ein av historia sine høgste norske poengsummar i denne konkurransen og fekk tredjeplass i både popklassen og sakral klasse. I tillegg vann koret sin dirigent Jon Flydal Blichfeldt dirigentprisen.

I «Syng for oss» i Bergen våren 2012 vann begge kora sine klasser, og Vokalensemblet Skrik vart i tillegg kåra til beste kor i konkurransen totalt.

– I løpet av våren 2013 vakna ideen om eit samarbeid mellom dei to kora, og søndag 15. september er Corona stolte av å kunne invitera til ein stemningsfull og variert korkonsert der kvart kor får syna fram sitt særpreg, sin klang og si songglede. Under konserten i Nysæter kyrkje, vert Corona leia av sin dirigent Synnøve Tollaas. I tillegg vert koret akkompagnert av fitjarbuen Irene Simonsen (piano) på to av songane frå “Sacred concert” (tekst og musikk av Duke Ellington), opplyser Anne Karin Nilsen i Corona til fitjarposten.no.