Sjølv om det framleis er kaldt både i sjøen, vatna og elvane har fleire starta badesesongen denne helga.

Etter ein ekstra lang og kald vinter er det framleis ganske så kaldt både i sjøen og vatna, men to strålande, flotte sommardagar har lokka mange til å kjøla seg ned i det våte element.

I Breiavikjo var det mykje folk innom i løpet av første pinsedag. Mange koste seg berre i sola eller på sandvolley-banen, men det var og fleire som tok eit bad sjølv om me ikkje målte temperaturen i vatnet til meir enn 8,5 grader.

I Fitjar-elva var det varmt til samanlikning. Etter at vatnet der hadde rent nedover over soloppvarma steinar synte termometeret i kulpen så pass mykje som 14 grader.

Det vert fortalt at i sjøen ligg temperaturen på mellom 8 og 9 grader. Denne journalisten kan ikkje skryta på seg eit bad, men ein annan av Fitjarposten sine arbeidarar har testa badevatnet i sjøen på Raunholm og fortel om ei forfriskande oppleving på omkring 10 grader. 

                 Eit forfriskande bad i Sandgåtehølen.