19.9 C
Fitjar
torsdag, 5. august 2021
- Annonse -
Heim Nyhende Fitjarposten-arkiv Stappfullt bibliotek på avslutninga av Sommarles

Stappfullt bibliotek på avslutninga av Sommarles

Mari Grimen t.h. nytta høvet til å få premien sin for Sommarles av biblioteksjef Silje Vågen Torbjørnsen. Foto: Kjetil Rydland.

495
Silje Vågen Torbjørnsen og Mari Grimen. Arkivfoto: Kjetil Rydland.

Langt over 100 små og store møtte opp på biblioteket under avslutninga av årets Sommarles, der dei fekk gleda av å oppleva framsyninga «Bokstavelig talt» ved Trond Magnum.

Aldri har me sett så mykje folk i biblioteket, det var stappa saman nærmare 150 unge bokelskarar saman med foreldre og andre vaksne. Ein stor del av dei 201 fitjarungane som har vore med på årets lesekampanje, var til stades. Og dei kom slett ikkje forgjeves.

Dagens tilreisande gjest var Trond Magnum frå Abrakadabra-teateret. Med song og musikk, leik og gjøgling fekk han med seg det unge publikum på ein måte som me sjeldan ser. Med levande dramatisering fekk me korte glimt frå bøkene til Alf Prøysen, Arne Svingen og andre barnebokforfattarar.

Trond Magnum frå Abrakadabra-teateret bergtok små og store i nesten tre kvarter. Foto: Kjetil Rydland.

Framsyninga «Bokstavelig talt» gjekk unna i stort tempo, og etter tre kvarter måtte gjøglaren vidare til Stord folkebibliotek for å halda det same showet der.

Medan han pakka saman, nytta ordførar Wenche Tislevoll gratulerte dei unge lesehestane med innsatsen i sommar. Heile 62 % av ungar frå 1. til 7. klasse i Fitjar har vore med på årets lesekampanje. Til saman har dei 201 ungane lese 2556 bøker, og ufattelege 260 070 sider! Ordføraren nytta høvet til å minna om kor viktig det er å bli glad i å lesa.

Me visste ikkje at det var plass til så mykje folk på Fitjar folkebibliotek. Foto: Kjetil Rydland.

Biblioiteksjef Silje Torbjørnsen leverte ut velfortente premiar til dei som ikkje hadde henta sine allereie. Og ordføraren hadde med seg ein refleks til kvar enkelt.

Me gratulerer dei unge lesarane med flott innsats, og ønskjer lykke til vidare.