Kjekt å vinna pokal med fitjarlaget Håkelklubben, synest stordabuane Jakob og Christian Myklebust. Foto: Kjetil Rydland.

Den 20. innecupen i Fitjar kultur- og idrettsbygg blei på mange måtar ein siger for ungdommen, dei var klart best både i dame- og eliteklassen, medan arrangørstaben er av den gamle, stødige sorten, som har halde koken heilt sidan starten i 2001.

Det var berre i open klasse veteranane gjekk heilt til topps. Her kunne lagkaptein Kjetil Østrem heva den store pokalen på vegner av DDR, ein gjeng stødige stordabuar med bakgrunn frå Stord IL. Østrem, Røyrane, Haukefær & co. vann den jamne finalen over dei noko yngre J-24 på motsett banehalvdel.

Kjetil Østrem tek imot pokalen av unge Kasper Fitjar. Foto: Kjetil Rydland.

Dei mest fitjardominerte laga nådde ikkje heilt opp denne gongen. Men det var i open klasse me fekk sjå den beste spelaren under denne turneringa. Som kjent er det viktig å ha ein god keeper, og dette beviste den gamle fitjarhelten Idar Volden Mjønes i to spanande straffekonkurransar.

I semifinalen i B-sluttspelet mellom Fest Elektro og Fort Gjort fekk me sjå ein knallhard keeperduell mellom Idar Mjønes og Thor André Bøe. Ein duell som vår mann avgjorde til Fest Elektro sin fordel med fleire utrulege redningar. I B-finalen fekk me ein liknande duell, der Idar imponerte like mykje, og sørgde for at Fest Elektro vann B-sluttspelet. Denne gongen var det framtidas Fitjar-keeper, unge Ståle Vestbøstad, som måtte strekkja våpen for den reaksjonssterke veterankeeperen, som ikkje trenar lenger.

– Eg trenar ikkje mykje, smiler den eminente keeperen, berre litt straffespark!

Idar Volden Mjønes imponerte med den eine redninga etter den andre. Foto: Kjetil Rydland.

I dameklassen fekk me ein spanande finale mellom Thea på Benk og Renegades FC. Sistnemnde har eit sterkt innslag frå Haugesund Toppidrettsgymnas, med fleire fitjarjenter på laget. Dei viste seg å vera eit strå kvassare, og kunne heva den store pokalen etter ein velfortent finalesiger.

Renegades FC jublar for siger i dameklassen. Foto: Kjetil Rydland.

Veteranlaget Rødhette frå Fitjar stilte med gamle kjende som Gro Hatlevik, Anne Helene Vestbøstad, Gunn Evy Henriksen og Anne Kristin Skår. Dei måtte nøya seg med bronsefinale, og her måtte dei strekkja våpen for Søndagsklubben.

Anne Kristin Skår klarer ikke å overlista Annette Juvik i målet til Søndagsklubben. Foto: Kjetil Rydland.

I eliteklassen fekk me eit høgst dramatisk oppgjer mellom unge, spreke stordabuar på laga Godt Og Blandet og 25. Favorittane 25 gjekk til slutt av med sigeren, men ikkje utan dramatikk. Heilt i byrjinga av finalen fekk lagkaptein Azwan Kadir ein skade som gjorde at han måtte sjå resten av kampen frå sidelinja. Og då keeper Heine Storevik fekk to minutts utvisning, såg det stygt ut for favorittane, som lenge låg under 1–2. Men dei utlikna i sluttminuttet, og straffekonkurransen vann dei etter fleire direkte dårlege straffespark av motstandarane.

25 frå Stord kan jubla over ein velfortent siger i eliteklassen. Foto: Kjetil Rydland.

Arrangørstaben med Ole Bergesen i spissen gjorde som vanleg ein prikkfri jobb, og fekk avvikla 68 kampar meir eller mindre på minuttet. Og heldigvis blei det ingen alvorlege skader, fortel Bergesen. Som vanleg var Rune Brakedal og Åsmund Sørfonn med i fremste rekkje. Det same var dommarane Roald M. Nilsen og Arild Træet. Magne Blokhus tok turen over Morkjo for å hjelpa til, og denne gongen fekk stordabuen æra av å dømma dei dramatiske finalane.

Ole Bergesen og Kasper Fitjar under ein av dei mange straffesparkkonkurransane. Foto: Kjetil Rydland.

Vonleg vil dei erfarne arrangørane halda ut endå nokre år, men rekrutteringa på arrangørsida ser ut til å vera sikra. Emil Sørfonn har lenge vore flink å hjelpa til, og i år fekk me sjå knapt 14 år gamle Kasper Fitjar i fremste rekkje under turneringa. Sistnemnde stod for premieutdelinga, og gjorde ein fin jobb. Dette er ungdommar me meir enn gjerne ser igjen!