– Fitjar Kino byrjar sesongen søndag 21. august med to knallfilmar, opplyser Ole Bergesen. Filmane er «Biler 2» som går i 3D, og deretter kjem «Harry Potter!»

Begge desse filmane har opna knallsterkt over heile landet og vil også i Fitjar trekkja mykje folk.

I slutten av september kjem den norske filmen Hodejegerne. Dettte er ei filmatisering av Jo Nesbø si bok med same tittel. Filmen er seld til ei rekkje land og kjem til å bli ein suksess. Også på barnefilmsida er det masse spennande utover hausten, lovar Ole.

– Ny Knerten-film kjem rundt 23. september, Ole Brum i oktober, ny Blåfjell-film kjem i november og før året er ute, har òg «Happy Feet 2» og ein ny «Alvin og Gjengen» vore på lerretet, seier Ole Bergesen, som vonar på ein god filmhaust i Fitjar.

– Etter digitalisering får me filmane mykje fortare etter premiere! Filmane blir annonsert i Fitjarposten samt på plakater i Sentrum. Sjekk også Bygdekinoen.no for program vidare utover hausten, oppmoder han.

Auke i vår

– Fyrste halvår har vore svært bra sjølv om det ikkje berre har vore knallfilmer. Ein auke i besøket 1. halvår 2011 med ca. 15 % mot første halvår 2010, fortel sitt om det, seier Bergesen til slutt.