Berre måla og poenga skilte topp frå botn i 4. divisjon då Fitjar tapte 1-3 for NHH i Bergen fredag kveld.

A-lagsgutane til Kjell Træet leverte ein av sine beste kampar i år då dei møtte serieleiarane til dyst på Krohnsminde kunstgras. Dei hadde fortent minst eitt poeng etter møtet med blårussen som leier avdelinga i 4. divisjon. NHH viste seg nemleg ikkje som noko storlag, og det skulle meir enn den skarpe linsa vår til for å sjå skilnad på topp og botn denne første fine kvelden i år.

Fitjar opna best, og hadde både spelet og dei fleste sjansane i første omgang. Det var såleis fullt fortent at dei kunne gå opp til 1-0 knapt 10 minutt før pause. Kjell André Thorland la eit fint frispark frå 18 meter inn på femmeteren. Her var det ingen som fekk kontroll på ballen før han spratt opp i brystkassen til Thomas V. Waage og i mål. Ikkje den mest elegante scoringa me har sett av storscoraren vår, men mål er mål!

Dessverre klarte ikkje Fitjar å halda på leiinga til pause; berre tre minutt brukte NHH på å utlikna til 1-1, ved Håkon Evensen. Han heada ein corner i mål. Og to litt for enkle mål i byrjinga av andre omgang øydela dagen for Fitjar. Stefan B. Christensson starta omgangen med å skru eit frispark frå 20 meter i mål, og 10 minutt seinare reiv innbytar Alexander Ekeogu Jensen seg laus og skaut i mål frå 10 meters hald og skrå vinkel. Dermed stod det brått 1-3 i en kamp som Fitjar hadde hatt taket på.

Alexander Ekeogu Jensen kom inn etter pause og var nok den som øydela dagen for hardt prøvde Fitjar-gutar. Han heldt eit høgare nivå enn både med- og motspelarar og skapte konstant trøbbel for Fitjar-forsvaret. Men Fitjar gav ikkje opp, og hadde sin del av spelet også i andre omgang. Litt ekstra hjelp fekk dei av at heimelaget måtte spela siste halvtimen med 10 mann, etter at Hjalmar Laudal Berge fekk det andre gule kortet sitt for dagen, og måtte visast vegen til garderoben.

Gårsdagens kamp gav ikkje poeng, men viste at Fitjar kan kjempa jamt med dei beste i puljen sin. Det er såleis ingen grunn til å gi opp kampen for å overleva i divisjonen. Også Bremnes og Stord 2 ser ut til å slita, og det er ikkje så altfor langt fram til dei andre laga på nedre halvdel. Fitjar har enno ikkje alle sine beste menn «under våpen», men kampen i går viste klar spelemessig framgang.

Thomas V. Waage begynner å likna på seg sjølv etter fråvær, og spelte ein bra kamp så lenge kreftene heldt. Også Badi Hurasi og Kjell André Thorland markerte seg positivt. Neste sjanse for poeng blir laurdag om ei veke, heime mot Gneist. Og måndag 22. juni blir det ny heimekamp, då mot Stord 2. Vonleg ser tabellen i 4. divisjon betre ut etter desse to kampane.


Ballen skrur ut av rekkevidda til Aleksander Henriksen og i mål, 2-1 til NHH. Foto: Kjetil Rydland.

 


Badi Hurasi med mange fine forsøk, her går ballen rett utanfor målet til NHH. Foto: Kjetil Rydland.

 


Krevjande å vera assistentdommar med denne sidelinja. Foto: Kjetil Rydland.

 

NHH – Fitjar 3-1 (1-1)
Seriekamp 4. divisjon
Fredag 5. juni kl. 18.30
Krohnsminde Kunstgress
Tilskodarar: 14

Fitjar sitt lag: Aleksander Henriksen, Johannes Myhre (Thomas Koløen 86.), Roger Almås, Torbjørn Korsvik, Andre Helland,
Øyvind Fykse Lie, Kjell Andre Thorland, Leif Andre Tangen (Sebastian T. Thomassen 22.), Badi Hurasi, Jonas Tislevoll (Rolf Solli 88.), Thomas Vestbøstad Waage (Mats Westvik 76.)

Mål: 0-1 Thomas V. Waage (37.), 1-1 Håkon Evensen (40.), 2-1 Stefan B. Christensson (46.), 3-1 Alexander Ekeogu Jensen (56.)

Gult kort: Mats Westvik, Fitjar

Raudt kort: Hjalmar Laudal Berge, NHH

Dommar: Ørjan Strand, Bjarg, IL