Ein sprell levande Gard Sandvik Bø på Søndagsskulens dag. Foto: Kjetil Rydland.

Søndagsskulens dag blei avvikla under familiegudstenesta i Fitjar kyrkje i går, og etterpå samlast unge og gamle på Fitjar bedehus.

Tilskipar var søndagsskulen på Fitjar saman med Tysdagsklubben i Øvrebygda. Ungane gjekk i prosesjon inn og ut av kyrkja, og deltok på familiegudstenesta som kyrkjevertar og med tekstlesing, drama, song og forbøn.

Etter gudstenesta blei 120 små og store med opp på bedehuset. Her var det stor aktivitet med pilkast, stylter, hage-bowling, karnevalssminke, fiskedam, spikerslag, lykkehjul frå Færøysundet og radiostyrte bilar. Og det vanka mange premiar for dei ulike aktivitetane.

Naturlegvis var det kafé med saltmat og søtmat til ein rimeleg penge. Arrangøren rekna ikkje noka inntekt av salet, men at det skulle bera seg. Alle aktivitetane var gratis.

Søndagsskulens dag i dag markerer oppstarten på eit nytt søndagsskule-år. Den første søndagsskulen i «det nye året» blir neste søndag i Fitjar bedehus.  Tysdagsklubben i Øvrebygda «tjuvstarta» i veka som var.

Søndagsskulens dag er ein gammal tradisjon som har halde på i «uminnelege tider». Innhaldet har endra seg med tida, og det såg ut som om opplegget i går trefte dagens ungar. Og no er det full fart med søndagsskule kvar søndag det ikkje er familiegudsteneste i Fitjar kyrkje.