Å høyre Kristin fortelje eventyr ein ikkje har høyrt før var ei deilig nostalgisk oppleving. Å lytte til songen til Johannes var fantastisk.

Særs profesjonelt og vakkert av begge to. – Jammen har dei utvikla seg sidan sist me høyrde dei! vart det kommentert etter at det heile var over.

Søskenparet Kristin og Johannes Aadland synte oss i kveld eit potensial og nivå som når langt ut over bygda og regionen vår. Det er grunn til å vere stolte av at dei er frå Fitjar.

Temakvelden hadde tittelen: «Den som ventar på noko godt», og me venta ikkje forgjeves. Tankevekkjande tekstar framført vekselvis av forteljaren Kristin og musikaren Johannes i tematisk samklang, var ein spennande presentasjonsmåte.

Me møtte eventyr med riddar, prinsesse, magisk bok, skattkiste og konge – og song med spenstige klangar og drivande engasjert pianospel.

Det heile munna ut i ein vakker samklang med eventyret om «Dei tre trea» og songen «Folkefrelsar til oss kom». Slik fekk òg jula sin bodskap narturleg plass i programmet – og minte oss om adventstida me snart går inn i.

Rundt 150 tilstadeverande fekk med seg den flotte kvelden.