Det meiner Ingve André Strand, som i år blei nummer to i NM crosskart for tredje gong på rad. Men han har ikkje tenkt å slutta som den evige toar, og satsar vidare mot gullet.

På Krabyskogen sist helg låg alt til rette for at Ingve skulle kapra den etterlengta gullmedaljen. Han leia med to poeng i samandraget på Jørgen Svindal, men Krabyskogen er ikkje lykkebanen hans. I 2006 knuste han ein crosskart her under dramatiske omstende, på den same banen der Ole Vidar Helland var ute for den store ulykka i 2001.

Ingve seier at alt det galne ser ut til å skje på akkurat denne banen. No er det kanskje mest psykologi som gjer at han ikkje lukkast her, men Ingve liker meir svingar og bakketoppar, slik at han får rytme i køyringa si. – På denne banen er det mest rett fram og sving og rett fram igjen, seier Ingve.

Med sjetteplassen i laurdagens A-finale kom Ingve på andreplass i NM, berre to poeng frå samanlagtsigeren, som gjekk til Simen Vardeberg. Han fortel at nesten alt gjekk imot han denne dagen, eit utal andre kombinasjonar på resultatlista her ville gitt NM-gull til lynet frå Tilslavodlen. Til dømes ville siger for Ludvik Einarsen, som starta i pole position, vore godt nok for Ingve. Og akkurat Einarsen var i ferd med å ta starten då han stoppa opp fordi han hadde trudde han hadde fått ein altfor god start. Og dermed stakk NM-vinnar Stian Vardeberg forbi og sikra seg NM-sigeren etter å ha kontollert løpet nesten heile vegen. Det hadde også vore godt nok for Ingve om Oscar Solberg eller Jack Fjelstad hadde vunne siste løpet. Sjølv kunne naturlegvis Ingve ha vunne samanlagt med ei betre plassering denne dagen i Krabyskogen. Men det blei for vanskeleg, då han måtte starta midt i andre rekkje i finalen, etter at det siste innleiingsheatet gjekk dårleg. Her kvelte han motoren i starten og enda som nummer seks.

Altså mange om og men og viss som kunne gitt NM-gull. Men om Ingve har ergra seg over detaljane som gjekk imot han denne gongen, ser han ikkje ut til å gråta over spilt mjølk. Han er den einaste crosskartføraren som har vore på pallen i NM fire sesongar på rad, etter bronse i 2010 og sølv dei tre siste åra. Dermed fekk han nok ein gong vist at han er like god som dei beste i landet, og faktisk den jamnasta av dei alle.         

– Konkurransen er knallhard, seier Ingve, og marginane er så små at du må ha litt flaks for å gå heilt til topps. Derfor er ikkje Ingve synleg skuffa, og er glad for å hamna på pallen igjen. – Men 4.-plass, det hadde vore nedtur!

No byrjar snart førebuingane til ein ny sesong, både for Ingve og sonen, Anders Halleråker Strand, som blir med for fullt vidare. Til vinteren skal dei oppgradera karten til junior, slik at han kan stilla i den mellomste klassen, 250 ccm. Sjølv vil Ingve fornya seg endå meir. Han har tenkt å selja karten sin, og reknar med å får ein god pris for den, ikkje minst fordi han har gode resultat å visa til. I november reiser Ingve til Hønefoss for å kjøpa byggjesett til ein flunkande ny crosskart. Han vil òg halda fram det gode samarbeidet med motorbyggjaren Sveinunggard på Geilo, og reknar med å stilla endå meir skarpskodd på startsreken til neste år.

I 2014 blir det NM-runde i Vikedal, noko både Ingve og racingteamet gler seg ekstra til. Til neste år blir nok hovudfokuset NM, sjølv om Ingve gjerne skulle ha satsa på NEZ – North European Championship – i tillegg. Men det kan bli for dyrt. I år måtte han ha reist til Finland for å kunna hevda seg samanlagt, og det blir veldig langt og dyrt. Ingve fortel at han allereie gler seg til neste sesong. Han er godt fornøgd med å kunna hevda seg i ein sport der nivået etter kvart er blitt svært høgt i toppen. Det er rundt ti førarar som til ei kvar tid er i stand til å gå heilt til topps. Og fleire av desse investerer mykje meir pengar enn han gjer. – Me er blant dei som får desidert mest ut av dei pengane me bruker, seier Ingve utan å leggja skjul på at han er litt stolt.  

Han vil heller ikkje gløyma dei velvillige sponsorane sine, som han er avhengig av for å hevda seg i Noregs-toppen i sporten sin. Hovudsponsor denne sesongen har vore Automester Stord Bil og Dekksenter AS, og i tillegg har desse vore viktige sponsorar: Sveinunggard motorteknikk på Geilo, Waage Anlegg AS, Engevik & Tislevoll AS, Altimek, Fitjar kommune, Fitjar Kraftlag, Hellanor og sist, men ikkje minst, Pappa Martin Strand. Ingve vonar dei blir med også til neste år og hjelper han fram til den etterlengta gullmedaljen.