Sokneprest Roald Drønen og Silje Rydland leier forsamlinga i salmesongen. Foto: Kjetil Rydland.

Det er tradisjon med gudsteneste på slippen i Dåfjorden andre påskedag, og i dag møtte over eitt hundre opp i det strålande påskevêret.

Vêret viste seg frå si aller beste side på Dåfjorden Slipp, og under gudstenesta 2. påskedag. I dag var sjette gongen det blei halde gudsteneste inne på verftsområdet i Dåfjorden, og dette teiknar til å bli ein tradisjon som folk set pris på.

Kyrkjelyden fylte 80 stolar framfor den flaggpryda verkstadhallen. Foto: Kjetil Rydland.

I det rekordvarme påskevêret blei gudstenesta skipa til utandørs, framfor verkstadhallen. Då Harald Johan Sandvik ringde inn til gudsteneste med kyrkjeklokka til «Titanic», var stolradene fulle, og dei som hadde kome seint, måtte ta til takke med ståplassar i bakgrunnen.

Då gudstenesta kom i gang, var over 100 feststemte kyrkjegjengarar til stades på verftsområdet. Sokneprest Roald Drønen hadde ikkje vore med på dette før, men det var det ingen som kunne sjå. Han ønskte velkomen, og takka Arnhild Sørestrand og Steinar Andersen for all velvilje og for at dei stiller området og verkstadhallen til disposisjon.

Som vanleg under desse påskegudstenestene på «Verven» var det god lyd i salmesongen. Kyrkjeverje Harald Rydland på elektrisk orgel, Sverre Fangel Brekke på slagverk, Hans Kobberstad på fiolin og Heine Bernt Helland på elgitar sytte for akkompagnement på ein framifrå måte. I tillegg var den eminente songfuglen Silje Rydland forsongar og solist på fleire songar.

Sokneprest Drønen heldt ein engasjerande tale over dagens tekst, frå Joh. 20, 11-18, då Jesus synte seg for Maria Magdalena etter oppstoda. – Tenk at bodet har gått frå Maria Magdalena til Jesu læresveinar og venene deira, og heilt til Dåfjorden! utbraut soknepresten.

Takkofferet denne gongen gjekk til Dåfjord bedehus, og det vart samla inn i to vernehjelmar. Då det nærma seg slutten, song Silje Rydland Bjørn Eidsvåg-låten «Til alle tider» til akkompagnement ved Hans Kobberstad på fiolin. Og heilt til slutt spela den eminente felespelaren «Påskemorgen». Ikkje akkurat ein rocka versjon, men i ei reinlenderform som fekk det til i rykkja i dansefoten på dei som driv med slikt.

Folket i Dåfjorden hadde laga til ein lekker kyrkjekaffi, med eit imponerande kakebord. Noko kyrkjelyden sette stor pris på. Samværet blei avslutta med ein god drøs i solveggen og på kaien, der folk kunne nyta synet av ein heil armada med veteranbåtar.

- Annonse -