Fitjar Revylag hausta inn heile tre prisar, og vart direkte kvalifisert til revyfestivalen på Høylandet, under Revyfestivalen på Fitjar i helga. I tillegg fekk arrangørane ros for eit prikkfritt gjennomført arrangement.

Revynummeret om Nokas-saken med Ole Bergesen som David Toska, Petter Aagaard som dommar, og Inge Matias Tvinnereim og Henning Wickmann som gode medspelarar, stod fram som eit komplett revynummer, med flott dramaturgisk oppbygging, god song og spennande og artige overgangar. Så hala dei òg i land både Publikumsprisen, Juryens fripris og prisen frå Norsk Revyfestival i Høylandet, som sender dei direkte, ferdig kvalifiserte, til Norsk Revyfestival på Høylandet 8.-12. juli 2009. 

Ole Bergesen og Petter Aagaard var òg med i IKEA-nummeret til Stryn Underhaldning, der Inge Matias Tvinnereim, aldeles nydeleg, song ei artig IKEA-tekst , med Ole og Petter som koristar. Noko som gav dei prisen for beste song-/musikalske innslag. 

Bladet Sunnhordland sin pris for beste tekst gjekk til Kvam Revyteater for ”Renter som kommer”, ein tekst der ein professor heldt føredrag om renter. Det var berre det han  heile tida sa j i  staden for r, og då vart eksempelvis fastrente til fastjente, rentepress til jentepress og liknande.  

Fedje teaterlag fekk prisen for beste sketsj der dei lagde eit sportskommentator-opplegg over eit kommunestyremøte, med ein innlagt parodi på ein tidlegare kjend sportsreportar. Beste monolog gjekk til Karmøyrevyen for innslaget ”Teletubbien”. Det er ikkje alltid me ler av at nokon spelar fulle, men denne gongen vart det gjort på ein utruleg dyktig måte.

Ein ekstrapris frå Norsk Revyfestival på Høylandet som gjekk på ”talent og potensiale” gjekk til Glesnes Teaterlag, som mellom anna song svært bra. 

Me lo og mykje av Førderevyen sitt innslag om brunsneglane, Lura revyteater med si hylling til egget og Fitjar sin eigen Oscar, alias Henning Wickmann, utan at nokon av desse nådde heilt opp i finalen.